Zbardhen të tjera ndryshime në ligjet e paketës anti-KÇK. Gazeta dje bëri të ditur se janë 5 ligje të tjera të ndryshuara përveç aktit normativ. Ligjet kanë shkuar në Parlament ndërsa po tregojmë detaje nga ndryshimet në ligjin për Policinë e Shtetit. Në këtë ligj një rëndësi e madhe i jepet procesit të përgjimit dhe gjurmimit të grupeve kriminale. Në aktin normativ i jepet dorë e lirë policisë të përgjojë, ndërsa në ndryshimet në ligjin “Për Policinë e Shtetit”, tregohen detaje në këtë aspekt. Ajo që bie në sy është se Operacioni Forca e Ligjit do të bëjë përgjime ambientale në të gjitha ambiente publike, përfshirë dhe transportin urban. “Gjatë veprimtarisë informative-gjurmuese ose të një procedimi policor, me qëllim parandalimin dhe zbulimin e veprave penale të autorëve të tyre, Policia e Shtetit përdor këto masa të veçanta: Përgjimin ambiental të bisedave të personave në ambiente publike, si dhe në mjete të transportit publik; Përdorimin e pajisjeve teknike për fotografimin, filmimin ose me video të personave në vende publike dhe përdorimin e pajisjeve gjurmuese të vendndodhjes; Përgjimin e bisedave telefonike ose telekomunikimeve, që rregullohet me ligj të veçantë; Mbikëqyrjen e fshehtë të personave të dyshuar për kryerjen e veprimtarive kriminale”, thuhet në draft. Më tej bëhet e ditur se përdorimi i masave të mësipërme bëhet me vendim të miratuar nga titullarët e strukturave të policisë, në nivel drejtorie qendrore e vendore. Ligji thekson më tej se procesi i përgjimit, gjurmimit apo dhe fotografimi nuk mund të zgjasë më shumë se 3 muaj. “Afati i përdorimit të masave të veçanta, të parashikuara në shkronjat “a”, “b” dhe “c”, të pikës 1, të këtij neni, nuk mund t’i kalojë 3 muaj. Kur këto masa përdoren për kryerjen e veprimtarisë informative-gjurmuese ose gjatë procedimit policor, me qëllim parandalimin dhe zbulimin e krimit të organizuar apo të krimeve të rënda, me kërkesë të drejtuesit të strukturës policore përkatëse, afati i përdorimit mund të zgjatet vetëm 1 herë me 3 muaj të tjerë”, thuhet aty.
Ngritja e Komitetit kundër krimit
Në ligj janë përcaktuar dhe procedurat që do të ndiqen për ngritjen e Komitetit Kombëtar të Politikave për Parandalimin dhe Luftën Kundër Krimit të Organizuar. “Pranë ministrit përgjegjës për çështjet e sigurisë e rendit publik dhe nën drejtimin e tij krijohet dhe funksionon Komiteti Kombëtar i Politikave për Parandalimin dhe Luftën Kundër Krimit të Organizuar. Komiteti Kombëtar i Politikave për Parandalimin dhe Luftën Kundër Krimit të Organizuar ka për objekt të veprimtarisë së tij hartimin, koordinimin, monitorimin dhe vlerësimin e strategjive dhe të planit të masave për parandalimin e krimit të organizuar”, thuhet në draft. Komiteti kryesohet nga ministri i Brendshëm dhe ka në përbërje ministrin e Drejtësisë, ministrin e Financave dhe Ekonomisë, Prokurorin e Përgjithshëm, drejtuesin e Prokurorisë së Posaçme kundër Korrupsionit dhe Krimit të Organizuar, drejtorin e Shërbimit Informativ të Shtetit, drejtorin e Përgjithshëm të Policisë së Shtetit, drejtorin e agjencisë përgjegjëse për luftën kundër terrorizmit dhe drejtorin e agjencisë përgjegjëse për parandalimin e pastrimit të parave. “Komiteti harton e publikon të dhëna mbi studime që identifikojnë shkaqet bazë të krimit, kontrolle sigurie, tendencat dhe kërcënimet e krimit të organizuar, rrethanat në të cilat vepron krimi i organizuar, grupet
profesionale dhe teknologjitë e përfshira në kriminalitet, duke përfshirë palët shtetërore dhe joshtetërore, efektivitetin e efiçencën e ligjeve, të politikave dhe të planeve të masave për të parandaluar e për të ulur krimin e organizuar, përmbushjen e detyrimeve që rrjedhin nga marrëveshjet ndërkombëtare”, thuhet në draft. Në fund thuhet se Komiteti mblidhet, të paktën 1 herë në 3 muaj dhe i paraqet raport periodik mujor Këshillit të Ministrave.
