Orkestra Simfonike e RTSH vjen mbrëmjen e së premtes me një koncert drejtuar nga dirigjenti i njohur Oleg Arapi. Solist në piano është italiani Lorenzi Di Bella. Në aktivitetin e tij pianisti italian njihet si fitues i çmimit të parë dhe medaljes së artë në konkursin ndërkombëtar “Horowitz”, në vitin 2005 në Kiev. Në këtë koncert do të jenë vepra nga autorët Mozart me uverturën “ Cosi fan tutte ”, si dhe koncert për piano, Nr. 20 në re minor, K 466. Po ashtu do të jetë dhe poemë simfonike “The Sorcerer’s Apprentice” nga Paul Dukas”, si dhe premiera “Espana ”, rapsodi për orkestër nga autori Emmanuel Chabrier.
Mjeshtri Oleg Arapi ka dirigjuar koncerte me solistë shqiptarë dhe të huaj. Ka drejtuar formacione të ndryshme orkestrale në Avellino, Napoli , Salerno, Brindisi, Dibër të Madhe, Strugë, Prizren, Prishtinë, Sarajevë, në Katedralen Angleze dhe Qendrën Ndërkombëtare të Muzikës në Moskë, në Kapelën Perandorake në Shën-Petërsburg. Ka drejtuar koncerte me orkestra filarmonike në Poloni, Moskë, Ukrainë, Ekuador, Pragë, Shenzhen Kinë, Mendoza Argjentinë, Kazan, Voronezh, Civitaniova në Itali. Repertori i dirigjentit përfshin veprat më të mira të kompozitorëve shqiptarë dhe atyre të huaj. Në 29 prill 2014 vuri në skenë premierën botërore të operës “ La cartomante” të kompozitorit Italian Salvatore Valente.
Studiuesja Iwona A. Siedlaczek, në gazetën polake “Lublin Kulturë ” ka thënë se dirigjenti Oleg Arapi mund të quhet ambasador i kulturës muzikore i vendit të tij. Në shtator 1989, në Takimin Kombëtar të Orkestrave Simfonike, Oleg Arapi nderohet me çmimin e tretë si dirigjent. Në shtator 1996, në Takimin Kombëtar të Shoqatave Kulturore, në qytetin e Sarandës, fiton “Kupën e Festivalit” me grupin artistik “Iliria” të qytetit të Vlorës. Në tetor 1996, në Konkursin Ndërkombëtar të Koreve, në qytetin Netanya, Izrael, Arapi nderohet me “Diplomën e Artë” me korin e grupit artistik “Iliria”.
Në prill 2013, dekorohet nga Akademia Internacionale “Imperiali” e Italisë, me medaljen “Ylli i artë”. Në qershor 2013, dekorohet me medaljen “Pushkin”, dhe në dhjetor 2017 dekorohet me medaljen “Glorias Artis ” nga Ministri Kulturës njëkohësisht zv. kryeministri polak. Koncerti do të zhvillohet në sallën “Iliria” te ish Sheraton, ku zhvillohen herë pas herë aktivitete të ndryshme.
