Reforma zgjedhore pritet të miratohet brenda këtij viti. Opozita parlamentare ndonëse prej pak kohësh nuk lëvizte nga kushti për të mos e votuar reformën zgjedhore në dy faza, siç e ka propozuar mazhoranca qeverisëse, por kërkonte që si rekomandimet e OSBE-se ashtu edhe ndryshimi i sistemit zgjedhor të votohen së bashku, ka filluar të tërhiqet. Kryetarja e grupit parlamentar demokrat, Rudina Hajdari u shpreh ditën e djeshme se vendi duhet të shkojë në dy palë zgjedhje për njëherë, parlamentare dhe lokale për daljen nga kriza. “Zgjidhja është vetëm 1, brenda Dhjetorit të zhbëhet marrëveshja e 2008, të miratohen rekomandimet e OSBE/ODHIR-it dhe vetëm më pas të kemi zgjedhje të parakohshme parlamentare e lokale dhe ta ndreqim këtë vend. Boll me kryetarë perandorakë që e kanë shkatërruar demokracinë në këtë vend”, u shpreh deputetja Rudina Hajdari. Por përveç kësaj, gazeta ka mësuar dhe detaje mbi draftin final që do i shkojë seancës plenare. Kur komisioni i reformës drejtohej nga Oerd Bylykbashi dhe Bledi Çuçi, u hartua një draft, i cili ka si bazë depolitizimin e komisioneve. Me këtë draft LSI është partia më e humbur. Sipas burimeve, edhe diskutimet që janë duke u zhvilluar tani me opozitën e re, janë mbi bazën e këtij dokumenti. Thelbi i tij nuk do ndryshojë, por pritet të reflektohen disa nga propozimet e deputetëve të rinj. Ky draft përmban të gjitha rekomandimet e OSBE-ODIHR.
Reagon Rama
Por edhe kryeministri Edi Rama u shpreh i vendosur se reforma zgjedhore do të mbyllet brenda këtij viti. Në një reagim për media pas përfundimit të mbledhjes së Kryesisë socialiste, shefi i qeverisë deklaroi se të gjitha rekomandimet e OSBE do të miratohen me apo pa PD, duke theksuar se opozita parlamentare e mbështet miratimin e reformës zgjedhore. “Reformën zgjedhore do ta bëjmë me të gjithë ata që duan të marrin pjesë në proces dhe do ta votojmë – sikundër përcaktohet edhe në pikën përkatëse të Parlamentit gjerman dhe në Parlament në dijeninë time ka një opozitë, e cila është e përfshirë në komisionin e reformës zgjedhore, ku ka dhe një karrige bosh për miqtë tanë të opozitës jashtë parlamentare dhe është në të drejtën e tyre të ulen apo të mos ulen në atë karrige. Por ne nuk do të presim dhe brenda këtij viti do të miratojmë reformën zgjedhore sipas rekomandimeve të OSBE/ODIHR”, u shpreh kryeministri Edi Rama. Më tej, shefi i qeverisë deklaroi se miratimi i reformës zgjedhore është një nga kushtet e Bundestagut, duke theksuar se rekomandimet e OSBE janë pjesë e ligjit zgjedhor dhe si e tillë do miratohet në Parlament. “Të ecim përpara me reformë zgjedhore dhe brenda vitit të ngjisim shkallën e parë, pra të miratojmë në parlament të gjitha rekomandimet e OSBE/ODIHR si pjesë e ligjit zgjedhor, të presim se në këtë aspekt nuk kemi ne diçka më shumë për të bërë plotësimin e Gjykatës Kushtetuese dhe me radhë të gjitha pikat e përcaktuara nga Bundestagu gjerman, të cilat janë siç e kam thënë më shumë se një herë, të rëndësishme për ne dhe jo të nevojshme për Gjermaninë në vetvete”, u shpreh Rama.
Elisjeda Kiko
