Qytetarët e Tiranës duhet që brenda datës 15 shtator të paraqiten pranë një pike të Ujësjellës Kanalizimeve Tiranë për të bërë deklarimin e sipërfaqes së banesës së tyre me qëllim pagesën e taksës. Afati i fundit u bë dje i ditur nga vetë UKT përmes një njoftimi të shpërndarë për mediat. Aty sqarohet edhe se taksa e ndërtesës do të llogaritet duke shumëzuar vlerën e ndërtesës me 0.05%, ndërsa bashkëngjitur është edhe një shembull konkret. “Njoftojmë të gjithë konsumatorët që afati për plotësimin e formularit të vetëdeklarimit është deri në datën 15.09.2019. Baza e llogaritjes së taksës së ndërtesës është vlera e “ndërtesës” shumëzuar me shkallën në përqindje të taksës së miratuar me ligj për kategorinë e ndërtesave për banim që është 0.05%. Si më poshtë: Vlera e ndërtesës x 0,05% = Taksën Vjetore të Ndërtesës (për ndërtesën/njësinë pronësore që përdoret, shfrytëzohet për banim). Shembull: (Apartament me sipërfaqe 70 m² x çmim vlerësues 60.000 lek/m²) x 0.05% = 2 100 lekë/vit 2 100 lekë (Taksa Vjetore): 12 muaj = 175 lekë/muaj Vlera e Taksës mbi Ndërtesën përfshirë në faturën mujore do të jetë 175 lekë. Ky vetëdeklarim kryhet lehtësisht në të gjitha pikat UKT”, thuhet në njoftim. Qytetarët, në momentin që do të paraqiten për të vetëdeklaruar sipërfaqen e banesës, duhet të kenë me vete një kopje të ID, certifikatën e pronësisë me kartelën e pasurisë/ kontrate shitblerje, dhurimi ose shkëmbimi/akt privatizimi apo vetëdeklarimi të ALUIZNI-t, rivlerësim të fundit të pasurisë nëse ka si edhe librezën e ujit apo një faturë UKT. Gjatë procesit të vetëdeklarimit kryhet edhe përllogaritja e taksës vjetore për ndërtesën tuaj të banimit. Në rast se vlera e vetëdeklaruar nga taksapaguesi rezulton e ndryshme nga vlera e llogaritur me çmimin e vlerësuar, si vlerë e bazës së taksës do të merret vlera më e lartë.
Kategoritë e përjashtuara nga taksa
Nga pagesa e taksës vjetore të banesës janë të përjashtuara disa kategori. Sipas njoftimit të Ujësjellës Kanalizime Tiranë, nga taksa përjashtohen pasuritë e paluajtshme; ndërtesa, pronë e subjekteve juridike ose fizike, që në bazë të marrëveshjeve me bashkitë përdoren nga këto të fundit si banesa sociale; ndërtesat që përdoren nga komunitetet fetare, në funksion të veprimtarisë së tyre; ndërtesat e banimit, të deklaruara si vendbanim nga kryefamiljarët që përfitojnë vetёm pension pleqërie/pension social, kur familja e tyre përbëhet vetёm nga pensionistë, ose dhe me persona në ngarkim të tyre, që janë të paaftë për punë dhe ndërtesat e banimit të kryefamiljarëve që trajtohen me ndihmë ekonomike. Nga ana tjetër, në kategorinë e taksapaguesve familjarë përfshihen pronarët ose poseduesit e objekteve që shfrytëzohen për banim/strehim. “Ndërtesa e cila u shërben njerëzve për nevoja themelore banimi, duke përfshirë shtëpitë, apartamentet, banesat dhe ndërtesat e ngjashme; garazhet e mbyllura; bodrumet si edhe çdo ndërtesë tjetër e ngjashme, mbi apo nën tokë, që nuk përdoret apo shfrytëzohet për qëllime të tjera veç atij të banimit”, njoftoi UKT. Pas procesit të vetëdeklarimit, kryhet edhe procesi i verifikimit në terren. Ai kryhet me qëllim korrektimin e bazës së të dhënave. Verifikimi në terren shërben edhe për të regjistruar për herë të parë ndërtesa/njësi pronësore ose nënndarje të saj. Në këtë rast, njësitë e vetëqeverisjes vendore/agjenti tatimor kërkojnë informacion nga burime zyrtare, nëse ka, për sipërfaqen e ndërtesës/njësisë pronësore apo nënndarjen dhe e krahasojnë me verifikimin e kryer.