Kolegji i Posaçëm i Apelimit ka lënë në fuqi vendimin e mëparshëm të Komisionit të Pavarur të Kualifikimit për gjyqtaren e Gjykatës së Apelimit të Krimeve të Rënda, Nertina Kosova.
Kujtojmë së një vit më parë KPK rikonfirmoi në detyrë gjyqtaren Kosova.
Trupa gjykuese e kryesuar nga Firdes Shuli, dhe e përbërë nga Roland Ilia, dhe Olsi Komici në bazë të tri kritereve të rivlerësimit, atë të pasurisë, figurës, dhe aftësive profesionale vlerësoi se Kosova e kalon me sukses vettingun.
Nertina Kosova është gjyqtarja që i ktheu pasaportën ish-ministrit të Brendshëm, Saimir Tahiri.
Pasi ka marrë konfirmimin në detyrë nga KPK, vendimi për gjyqtaren Nertina Kosova është ankimuar nga Komisioneri Publik.
Ankimimi nga Komisioneri Publik u bë pasi, sipas njoftimit, hetimi i KPK për vlerësimin e aftësisë profesionale nuk është i plotë, duke u konsideruar i pamjaftueshëm për të konfirmuar në detyrë Kosovën.
