Ministria e Kulturës prej vitesh ndan vetëm dy çmime kombëtare të letërsisë. Edhe vitin që lamë pas u ndanë çmimet “Vepra letrare më e mirë e vitit” dhe “Vepra letrare më e mirë e vitit e përkthyer”. Nëse për ministren në largim të Kulturës Mirela Kumbaro kjo ka qenë mjaftueshëm, për shkrimtarët është shumë pak për vlerësimin që duhet për letërsinë. Shkrimtarë të njohur kërkojnë rikthimin e çmimeve si më parë, ku vlerësoheshin romani,tregimi, përkthimi, autorët e rinj, letërsia për fëmijë, etj. Ata shprehen se ministrja e re që do të jetë në krye të Ministrisë së Kulturës duhet ta shikojë me seriozitet këtë kërkesë të tyre që është bërë prej vitesh. Poeti Bardhyl Londo si dhe shkrimtarët Pandeli Koçi dhe Xhahid Bushati shprehen se ministrja në largim Mirela Kumbaro me këtë reduktim të çmimeve solli një varfëri në gjykimin e vlerave të letërsisë shqipe. Poeti i njohur Bardhyl Londo tregon se nga dhjetë çmime, Kumbaro la vetëm dy. “Kanë qenë dikur në mos gaboj dhjetë çmime. Unë kam pasur konceptin dhe kam që në Shqipëri ka aq pak çmime dhe aktivitete letrare, dhe duke i reduktuar ato kalon në një varfëri të tejskajshme. Unë nuk jam i mendimit që nuk duhen pakësuar madje duhen shtuar, por duke ruajtur gjithmonë seriozitetin. Dhe serioziteti ruhet gjithmonë nga institucioni që i krijon këto çmime, që është Ministria e Kulturës”, pohon poeti Londo. Më tej ai shton se kur kanë kaluar pesë vite nuk dihet se pse erdhi ky reduktim. “Kur erdhi ministrja e Kulturës ajo gjeti të paktën dhjetë çmime. Ishte çmimi special që e merrte një vepër me vlera të jashtëzakonshme, që dhe nuk mund të ishte i përvitshëm por kur ishte një vepër me vlera të spikatura, jepej çmimi për romanin, tregimin, poezinë, letërsinë për fëmijë, jepej çmimi për gazetarinë letrare, që Kumbaro e hoq, çmim për përkthimin, për të autorët e rinj. Pra ishin shumë çmime dhe unë s’e kuptoj pse u hoqën”, shprehet Londo.
Nga ministria u përjashtua letërsia për fëmijë
Shkrimtari Xhahid Bushati tregon se për librin shqip dhe autorët shqiptarë Kumbaro tregoi mungesë vlerësimi dhe vëmendje. “Ishin disa çmime, por ministrja Kumbaro i hoq të gjitha mbetëm vetëm dy. Por kjo sjell varfëri në gjykimin e vlerave të letërsisë shqipe. Romani ka qenë çmim më vete, proza, tregimi, novela bashkë, libri me poezi ishte veç si çmim, ishte çmimi për autorin më të mirë të ri, pra kanë qenë një seri çmimesh dhe të gjitha u shumëzuan me zero nga ministrja Kumbaro. I hoq të gjitha dhe ka lënë vetëm dy, një që është për veprën më të mirë shqipe dhe një për përkthimin më të mirë. Më vjen keq që me heqjen e çmimeve u hoq dhe emri letërsi për fëmijë në ministri. Ministrja e re që do të jetë në atë ministri duhet patjetër që të ketë vëmendje për çmimet dhe të rikthehen si kanë qenë dikur. Letërsia për të rritur të jetë veçmas për çmime dhe ajo për fëmijë më vete”, pohon Bushati. Më tej autori shkodran vijon se në një kohë që Ministria e Kulturës ka përjashtuar dhe çmimin e letërsisë për fëmijë, Kumbaro bën fushatë me fëmijët për leximin. “Nismë e ministres Kumbaro takohemi me një libër, po si bëhet kjo? Takohemi për një libër dhe çmimet e letërsisë për fëmijë i ka hequr nga konkursi që bëhet? Si është e mundur? Një ministre që ka përjashtuar çmimet e letërsisë dhe ndërkohë shpall dhe nismën për lexim. Por kjo letërsi ka një vlerë dhe vlerat i përcaktojnë çmimet. Në vitet e ministres Kumbaro në atë Ministri Kulture është bërë fare pak për librin shqip dhe autorët shqiptarë. Ka mbetur më shumë ministre e fasadës, ministre që ka dhënë vetëm dy çmime dhe ka përjashtuar letërsinë për fëmijë”, shprehet më tej shkrimtari Xhahid Bushati. Me të njëjtin mendim është dhe autori Pandeli Koçi. “Çmimet duhet të rikthehen si ka qenë më parë, ne kemi vite që e kemi kërkuar këtë. Kanë qenë disa çmime, për romanin, për poezinë, tregimi, letërsia për fëmijë, etj. Normal ne presim që ministrja që do të vijë ta ketë në vëmendje këtë kërkesë”, pohon shkrimtari Pandeli Koçi. / Nga Julia VRAPI