Merkato e dimrit ka nisur bujshëm në Kategorinë Superiore. Klubet pretendente janë ato që dhanë shkëndijën e parë, me afrimet e tyre cilësore, duke dëshmuar se kanë pretendime të forta për titullin kampion. Në fakt, këto shkëndija i kishte dhënë i pari Kukësi që në ditët e fundit të vitit të kaluar, kur mori nga Luftëtari dy futbollistë cilësorë si Eduard Rroca dhe Vasil Shkurtaj, të cilët i prezantoi dy ditë më parë në gjirin e klubit verilindor. Pra Kukësi ka ambicie titulli dhe kjo është e kuptueshme, pasi prej gati pesë vitesh kjo skuadër luan në nivele të larta, ka qëndrueshmëri dhe ka mundur të përfaqësohet me dinjitet edhe në Ligën e Europës. Si për të kujtuar që nuk e lëshon kreun e renditjes, Partizani “Kampion Dimri” iu kundërpërgjigj Kukësit rrufeshëm, dhëmb për dhëmb, teksa dje prezantoi zyrtarisht blerjen e parë të kësaj merkatoje dimri, Fatjon Jusufin, futbollist shqiptar nga Maqedonia. Edhe pse u përfol se afrimi i parë i Partizanit në merkaton e dimrit do të ishte Dilaver Duka, mesa duket lëvizja e parë e Partizanit vjen nga Maqedonia. Fatjon Jusufi është zyrtarisht futbollisti më i ri Partizanit për pjesën e dytë të këtij sezoni. Mesfushori me tipare sulmuese ka arritur marrëveshjen me drejtorin teknik të 15-herë kampionëve Olsi Rama për një kontratë 2-vjeçare me opsion rinovimi edhe për një tjetër sezon. “Prej 5 sezonesh 23-vjeçari ka qenë pjesë e Renovës teksa në këtë kampionat numëron 14 paraqitje dhe dy gola të realizuar në kampionatin maqedonas. Jusufi mund të aktivizohet në të dy krahët e repartit të avancuar por edhe si sulmues i dytë. Jusufi ishte pjesë e Renovës, pasi te kjo skuadër ka hedhur hapat e parë në karrierë duke filluar që nga mosha 9-vjeçare”, shkruan për të “Supersport”. Pak ditë më parë ai konfirmoi largimin nga skuadra tetovare pasi i përfundoi edhe kontrata. Jusufi pasi është prezantuar në ambientet e klubit të kuq i është bashkuar menjëherë skuadrës për të nisur përgatitjet në Antalia të Turqisë.
Ia mori Kukësi dy lojtarët më të mirë, Luftëtari sheh drejtime të reja
Një marrëveshje “xhentëlmenësh” midis drejtuesve të Kukësit dhe atyre të Luftëtarit bënë që gjirokastritët të lëshojnë dy prej lojtarëve të tyre më të mirë, në favor të ekipit verilindor, lëvizje që kanë prej ditësh që kanë shkaktuar bujë në Superiore. Luftëtari ishte një “supermarket” i çmuar për Kategorinë Superiore por me rregullimin e situatës financiare tashmë vëmendja shkon tek arritja e objektivave. Klubi ka humbur dy elementë shumë të rëndësishëm, fantazistin Eduart Rroca dhe sulmuesin Vasil Shkurtaj. Të dy futbollistët kaluan tek Kukësi që synon të fitojë titullin, ndërkohë që në arkat e klubit një shumë e majme parash. Drejtuesit zikaltër janë hedhur në merkato dhe tashmë po mendojnë seriozisht riformatimin e skuadrës në mënyrë që të vijojnë të jenë konkurrentë deri në fund. Sigurisht që largimet e Rrocës dhe Shkurtajt duhen mbuluar me afrime në merkato, ku janë piketuar disa emra. Në rolin e fantazistit pëlqehet shumë shkodrani Erjon Vucaj, me të cilin kanë nisur prej kohësh kontaktet. Ndërkohë për sulmin janë dy opsione që vijnë nga tregu i huaj edhe pse për momentin mbeten enigmë emrat konkretë. Gjithashtu vëmendja shkon edhe tek alternativat, pasi në pjesën e parë të kampionatit Luftëtari nuk ka patur një grup të plotë në dispozicion. Ivan Jakovleviç përfundimisht e ka mbyllur sezonin duke qënë se i duhet të operohet sërish. Në këto kushte drejtuesit janë në kërkim të një mbrojtësi të majtë që mund të jetë alternativë e brazilianit Xhekson, i vetmi lojtar natyral në atë pozicion. Ndërkohë janë rritur kuotat për Aurel Demon dhe Donald Cakën që në ndeshjet e fundit kanë bindur për të patur më shumë minuta në dispozicion./ Adriatik BALLA