Shtetet e Gjirit Persik janë gjendur në vijën e parë të përshkallëzimit të fundit në Lindjen e Mesme dhe, sipas raportimit të BBC, janë thellësisht të shqetësuara dhe të zemëruara me Iran. Teherani iu përgjigj sulmeve ajrore të SHBA-së dhe Izraelit duke lëshuar qindra raketa dhe dronë drejt fqinjëve arabë, duke synuar bazat ushtarake amerikane në territorin e tyre, por edhe infrastrukturë civile e energjetike, çka ka tronditur imazhin e rajonit si një qendër e sigurt për turizëm, financa dhe investime.
Megjithëse shumica e raketave janë interceptuar nga sistemet e mbrojtjes ajrore, mbeturinat kanë shkaktuar viktima dhe zjarre, ndërsa dronët kanë sjellë kaos dhe ndërprerje të trafikut ajror e tregtisë. Sipas Financial Times, Irani ka goditur pothuajse po aq objektiva në Emiratet e Bashkuara Arabe sa edhe në Izrael, duke rritur presionin mbi një nga qendrat kryesore ekonomike të Gjirit. Zëdhënësi i Ministrisë së Jashtme të Katar, Majed al-Ansari, deklaroi se “të gjitha vijat e kuqe janë kaluar”, duke paralajmëruar se sulme të tilla nuk mund të mbeten pa përgjigje.
Ndërkohë, gjashtë vendet anëtare të Këshillit të Bashkëpunimit të Gjirit – Arabia Saudite, Kuvajti, Katari, Bahreini, Emiratet e Bashkuara Arabe dhe Omani – zhvilluan një mbledhje urgjente, duke premtuar masa për mbrojtjen e sigurisë dhe stabilitetit të tyre. Deri tani, ato kanë refuzuar t’i lejojnë SHBA-së përdorimin e hapësirës ajrore për sulme ndaj Iranit, por një zgjatje e konfliktit mund t’i shtyjë drejt një përfshirjeje më të drejtpërdrejtë. Strategjia iraniane për të rritur koston e luftës për fqinjët e tij mund të rezultojë e rrezikshme, pasi rrezikon t’i afrojë edhe më shumë me Uashingtonin dhe të thellojë izolimin e vet.
