Ukraina kreu një nga sulmet e saj më të suksesshme që nga fillimi i luftës, duke goditur Votkinskun, një qytet në republikën ruse të Udmurtisë, rreth 1,300 kilometra larg kufirit ukrainas, sipas raportimit të AOL.
Objektivi ishte Instituti Votkins, një nga shtyllat kryesore të industrisë ruse të raketave, ku prodhohen raketat balistike Iskander, raketat hipersonike Kinžal dhe komponentë për raketat balistike ndërkontinentale. Shtabi i Përgjithshëm i Ukrainës konfirmoi sulmin dhe njoftoi për shpërthimin e një zjarri në objekt, ndërsa guvernatori rajonal Aleksandr Brechalov pranoi se pati dëme dhe të lënduar; sipas burimeve ruse, 11 persona u plagosën, tre prej tyre në gjendje që kërkoi shtrim në spital. Autoritetet ruse nuk dhanë detaje mbi shkallën e dëmeve, por fakti që një strukturë kaq e rëndësishme u godit thellë brenda territorit rus përbën një zhvillim me peshë strategjike.
Sipas të dhënave të publikuara, sulmi u krye me një raketë lundrimi vendase Flamingo (FP-5), e zhvilluar nga kompania ukrainase Fire Point, me rreze veprimi mbi 3,000 kilometra dhe me kosto më të ulët se sistemet perëndimore. Ekspertë të cituar në media vlerësojnë se prodhimi i raketave Iskander mund të ndërpritet deri në gjashtë muaj, çka do të ndikonte drejtpërdrejt në aftësinë goditëse të Rusisë. Në kushtet kur mbrojtja ajrore e Ukrainës përballet me sfida në rritje dhe sistemet Patriot mbeten ndër të vetmet mjete efektive kundër raketave balistike, Kievi duket se po zhvendos fokusin drejt goditjes së burimit, pra infrastrukturës ushtarako-industriale ruse. Sulmi në Udmurti sinjalizon se objektet strategjike ruse, edhe larg vijës së frontit, nuk janë më të paprekshme.
