Presidenti i SHBA-së, Donald Trump, ka shpjeguar pse vendosi të rrisë tarifat mbi importet zvicerane deri në 39 përqind. Arsyeja, tha ai, ishte një bisedë telefonike e tensionuar me zyrtaren zvicerane Karin Keller-Sutter.
Trump tha se për shkak të deficitit tregtar prej 42 miliardë dollarësh, ai fillimisht vendosi një tarifë prej 30 përqind, të cilën e rriti në 39 përqind pas një telefonate kontroverse në të cilën nuk i pëlqeu toni i gruas me të cilën po fliste. Trump e ritregoi të gjithë incidentin, duke e quajtur gabimisht Keller-Sutter “kryeministre”, edhe pse ajo është në fakt anëtare e Këshillit Federal Zviceran. Ai theksoi se askush nuk mund ta besonte që Zvicra nuk kishte paguar më parë asnjë detyrim doganor, ndërsa SHBA-të regjistruan një deficit prej 42 miliardë dollarësh me atë vend. “Na u desh të bënim diçka për ta barazuar paksa atë,” tha Trump.
Me interes të veçantë është përshkrimi i tij për vetë Keller-Sutter, të cilën ai e konsideronte një bashkëbiseduese shumë këmbëngulëse. “Ajo ishte shumë agresive, por e sjellshme. Tha: ‘Zotëri, ne jemi një vend i vogël. Nuk mund ta bëjmë. Nuk mund ta bëjmë’”, tha Trump. Por taktika e saj për të theksuar madhësinë e saj modeste nuk funksionoi me presidentin amerikan. ”Nuk mund ta hiqja nga telefoni”, u ankua ai. “Mund të jetë një vend i vogël, por ne kemi një deficit prej 42 miliardë dollarësh me ju”, u përgjigj ai. Trump kujtoi deklaratat nga samiti i fundit i Davosit, ku konfirmoi se, nën presionin e kompanive të mëdha zvicerane si Rolex, ai kishte rënë dakord të ulte tarifën nga 39 përqind në 15 përqind. “E uli atë sepse nuk dua t’i lëndoj njerëzit, por kjo nuk do të thotë se nuk do të rritet përsëri”, paralajmëroi Trump.
