Pamjet janë regjistruar mesditën e kësaj të mërkure te Kryeministria dhe në to dallohet qartë sesi disa punonjës nxjerrin mijëra faqe me dokumente nga institucioni qendror qeveritar dhe i ngarkojnë në një furgon të bardhë.
Denoncimi vjen nga anëtarja e lëvizjes Shqipëria Bëhet, Edona Haklaj, e cila ngre pikëpyetje mbi veprimet që po ndodhin atje.
“Pyetje: Ku po shkojnë këto dosje dhe ç’fshihet brenda tyre? Se ç’më kujton një rast të ngjashëm të spastrimit që u bë një vit më parë në Bashki, kur po arrestohej Lali”, shkruan anëtarja e Shqipëria Bëhet, e cila ashtu si aktivistët e tjerë proteston aty prej më shumë se një muaji.
Nga pamjet, dallohen qartë disa punonjës që hyjnë e dalin nga Kryeministria, drejt furgonit të bardhë që është stacionuar në hyrjen kryesore të institucionit, duke mbajtur në krah mijëra faqe dokumente që i kalojnë në mjet.
Megjithatë, nuk dihet nëse ndonjë nga ambientet e godinës do t’i nënshtrohet rikonstruksionit dhe po zhvendosen materialet, apo kemi të bëjmë me veprime të tjera…
