Merkato po njeh orët e fundit të saj në këtë afat kalimtar dimëror dhe një pjesë e klubeve po nxitojnë të bëjnë blerjet e tyre brenda limiteve të kohës për të përforcuar grupet për pjesën e mbetur të sezonit. Atletiko Madridi nuk ka humbur kohë për të reaguar pas humbjes në Ligën e Kampionëve ndaj Bodo/Glimt. Drejtori sportiv Mateu Alemany ka punuar për të afruar lojtarë të rinj para mbylljes së afatit kalimtar, edhe pse kishte deklaruar se nëse deri të enjten nuk do ta kishte të qartë se çfarë mund të bënin, “Los Rojiblancos” nuk do të ndërmerrnin lëvizje. Të hënën në mbrëmje, Alemany udhëtoi drejt Gjermanisë për bisedime me mesfushorin e Bajern Munih, Leon Goretzka, i cili i skadon kontrata në verë. Ai duket se është shndërruar në objektivin kryesor për mesfushën, pasi Ederson dos Santos dhe Zhao Gomes vlerësohen si marrëveshje të shtrenjta rreth 40 milionë euro.
Negociatat me Bajernin për Goretzkën tashmë kanë nisur. Sipas raportimit të gazetës “Marca”, Atletiko Madridi ka dorëzuar një ofertë prej 2–3 milionë eurosh për Goretzkën dhe ka pranuar gjithashtu të mbulojë pagën prej 8.5 milionë eurosh që ai duhet të marrë për pjesën e mbetur të vitit. Bajern më herët kishte kërkuar 10 milionë euro për mesfushorin, por është në një pozitë të dobët negociuese për shkak të skadimit të kontratës së tij. Duket se bavarezët janë të gatshëm t’i japin dritën jeshile kushteve të mësipërme.
Bajern kishte tentuar më parë ta shesë Goretzkën për të lehtësuar pagën e tij prej 17 milionë eurosh në vit dhe, pasi ka humbur vendin e titullarit, lojtari është i interesuar të gjejë një klub të ri jashtë Gjermanisë. 30-vjeçari do t’i ofrohej një kontratë 2.5-vjeçare nga Atletico, deri në vitin 2028. Pas fitores 2-1 të Bajern Munih ndaj PSV Eindhoven në Ligën e Kampionëve, trajneri Vincent Kompani u pyet për të ardhmen e Goretzkas. Florian Pletenberg citoi përgjigjen e tij, ku duket se ai e pranon mundësinë e largimit.
“E di që nesër në mëngjes do të zgjohem dhe në një moment do të kem një bisedë të tillë me Max-in ose me Kristofin – ku duhet të shkëmbejmë mendime për skuadrën. Por nuk bëhet fjalë për vullnetin tim. Bëhet fjalë për atë që është e drejtë për Leonin, FC Bajernin dhe ekipin.” Duket se Atletiko po i afrohet zëvendësuesit të tyre në mesfushë për Konor Gallagher, i cili u largua për 40 milionë euro më herët gjatë këtij afati kalimtar. Alemany po punon gjithashtu për transferimin e një sulmuesi para mbylljes së merkatos.