Trajneri i Real Madridit, Ksabi Alonso, ka injoruar spekulimet rreth sigurisë së tij në detyrë pas një serie rezultatesh zhgënjyese, duke thënë se ai është i fokusuar ekskluzivisht te përgatitja e skuadrës për ndeshjen e së mërkurës mbrëma ndaj Atletiko Bilbaos dhe përmirësimin e lojës së tyre. Alonso zbuloi gjithashtu se ka folur me Florentino Perez që nga e marta, kur ai deklaroi se kishin diskutuar për skuadrën.
Skuadra e Alonsos i dha fund një serie prej tre ndeshjesh pa fitore të mërkurën e kaluar kundër Olimpiakosit, por barazimi me Xhironën të dielën ka shtuar edhe më shumë shqetësimet për formën e Real Madridit. Sipas raportimeve, Perez do të diskutojë të ardhmen e Alonsos me drejtuesit e tjerë pas ndeshjes me Athletik Klub. Para ndeshjes, Alonso u pyet nëse ishte i shqetësuar që njerëzit po vënë në dyshim vazhdimësinë e tij. “Jam i fokusuar te nesërmja, te përgatitja e skuadrës. Ka ende një rrugë të gjatë përpara, më shumë se një e treta e sezonit, gjithçka është shumë e ngushtë dhe ka shumë për t’u bërë. Kjo mund të ndryshojë shumë. Po e kemi të vështirë të fitojmë jashtë fushe, por mund ta bëjmë nesër. Jemi aty ku jemi, si në renditje ashtu edhe në gjithçka tjetër. Jetojmë me presionin. Jemi të fokusuar te ajo që mund të ndryshojmë”, shtoi ai.
Ai u pyet gjithashtu nëse kishte folur me Perez që nga java e kaluar, kur kishte siguruar se presidenti i Real Madrid ishte pas tij. “Kam folur sërish me presidentin, dhe ishte shumë pozitive, me tone të mira. Ne duam të përmbysim rezultatet, dhe për këtë folëm”, vazhdoi Alonso. Një pjesë e shqetësimit lidhet me ndryshimin e madh të pamjes së Real Madridit krahasuar me fillimin e sezonit, ku ata bënin presing të lartë, kontrollonin ndeshjet dhe fitonin me lehtësi. Ai u pyet se cili ishte koncepti pas skuadrës së tij. “Ne po luajmë futboll, përpiqemi të bëjmë më të mirën. Ka pasur ndeshje të mira, por edhe disa jo aq të mira. Kjo është arsyeja pse nuk i kemi fituar ato ndeshje. Dhe këtë duam të korrigjojmë, të luajmë më në mënyrë më konsistente, sepse kërkesa është të luajmë më mirë çdo ndeshje”, tha ai. Alonso siguroi se skuadra e tij është e qartë për atë që dëshiron të bëjë dhe si duhet ta zbatojë, kur iu vu në dukje se presingu nuk ishte në të njëjtin nivel. “Lojtarët e kuptojnë atë që duam të bëjmë dhe si mund të përmirësohemi. Pa organizim është e pamundur, dhe duhet të punojmë për këtë, sigurisht. Ditën tjetër u përmirësuam në pjesën e dytë, dhe kjo është arsyeja pse patëm më shumë raste. Por gjithçka nis nga bindja”, bëri me dije trajneri spanjoll.