Policia e Shtetit, në bashkëpunim me autoritetet europiane, ka arrestuar në Francë Paul (Agustin) Dedën, ish-truproja i Saimir Tahirit dhe pjesëtar i një organizate kriminale ndërkombëtare.
50-vjeçari ishte i shpallur në kërkim për trafikim të mbi 1 ton lëndë narkotike Cannabis, që dyshohet se u tentua të trafikoheshin nga Shqipëria në Itali.
Arrestimi u realizua në kuadër të operacionit “The Wanted”, pas shkëmbimit në kohë reale të informacionit mes Interpol Tiranës dhe homologëve në Paris. Gjykata ka caktuar për të masën e sigurisë “Arrest në burg” për akuzat e trafikimit të drogës dhe pastrimit të parave.
Njoftimi i policisë:
Policia e Shtetit/Vijon bashkëpunimi me homologët europianë, në kuadër të operacionit “The Ëanted”.
Kapet në Francë, pjesëtari i një organizate kriminale ndërkombëtare që akuzohet nga SPAK, për trafikimin e mbi 1 ton Cannabis, në Bari, nëpërmjet rrugës detare.
Si rezultat i sigurimit të informacionit nga struktura të specializuara të Policisë së Shtetit, dhe shkëmbimit të tij në kohë reale, nëpërmjet Interpol Tiranës, me homologët në Paris, në kuadër të kësaj faze të operacionit “The Ëanted”, policia franceze lokalizoi dhe arrestoi me qëllim ekstradimin në Shqipëri, shtetasin shqiptar, të shpallur në kërkim ndërkombëtar, P. D., 50 vjeç.
GjKKO-ja i ka caktuar 50-vjeçarit, masën e sigurisë “Arrest në burg”, për trafikim të lëndëve narkotike dhe pastrim parash, kryer në kuadër të organizatës kriminale.
Nga hetimet e kryera dyshohet se shtetasi P. D., në bashkëpunim me shtetas shqiptarë dhe italianë, kanë tentuar të trafikojnë në Itali, nëpërmjet rrugës detare, 1016 kilogramë lëndë narkotike Cannabis Sativa të kultivuar në Shqipëri. Sasia e lëndës narkotike u sekuestrua në Bari, nga Policia italiane, ku gjithashtu u arrestuan 2 pjesëtarë të kësaj organizate kriminale.
Interpol Tirana vijon të bashkëpunojë me homologët në Francë, për të finalizuar procedurën për ekstradimin në Shqipëri, të 50-vjeçarit.