RENEA ka arrestuar në Durrës mbrëmjen e së shtunës, Kreshnik Farrukun. Arrestimi i tij është urdhëruar nga SPAK. Farruku u vetëdorëzua pak ditë më parë në Policinë e Durrësit, ndërsa gjykata i caktoi masën arrest shtëpie. Por duket se Farruku ka llogari të hapura me SPAK, përveç ekstradimit drejt Italisë në lidhje me aktivitetet kriminale që kanë zhvilluar në kuadër të organizatës së strukturuar ndërkombëtare që drejtojnë. Dy vëllezërit, Kreshnik Bodlli (Farruku) dhe Erneo Farruku, të njohur për përfshirjen e tyre në një klan kriminal të trafikut të lëndëve narkotike, vendosën të vetëdorëzohen pranë Policisë së Durrësit.
Reagon SPAK
Ndërkohë Prokuroria e Posaçme (SPAK) ka identifikuar dje “kokën” e grupit të strukturuar kriminal të trafikut të drogës që vepronte në Itali. Mësohet se është identifikuar “koka” e grupit, i cili merrej me organizimin, magazinimin dhe më pas shpërndarjen e drogës në Itali. Bëhet fjalë për Kreshnik Farrukun (Budlla) i cili i kishte arritur t’i shpëtonte autoriteteve italiane pasi nuk ishte identifikuar dot prej tyre, gjë që më pas është bërë nga autoritetet shqiptare. “Nga veprimtaria hetimore e kryer në Shqipëri, është bërë identifikimi i shtetasit, K.B, anëtar i grupit të struktuar kriminal, i paidentifikuar nga autoritetet italiane, i cili merrej me organizimin e pritjes, magazinimin e drogës në Itali dhe më pas shpërndarjen në tregun italian”, njoftoi dje për mediat SPAK. Farruku u dorëzua disa ditë më parë së bashku me të vëllanë në polici dhe më pas u lanë në masën detyrim paraqitje. Ndërkohë që mbrëmjen e djeshme (11 janar 2025) Kreshnik Farruku, i njohur si kreu i klanit “Farruku’ u arrestuar me urdhër të SPAK. Ai u prangos në Manzë të Durrësit me kërkesë të SPAK në bashkëpunim me prokurorinë e Firenzes me qëllim ekstradimin drejt Italisë.
Për riarrestimin e Farrukut në Manzë ku qëndronte në arrest shtëpie ndërhyri reparti special RENEA. Ai do të qëndrojë i izoluar në ambientet e Policisë së Tiranës, për të dalë të hënën para Gjykatës së Posaçme. Kujtojmë se grupi për të cilin bëhet fjalë, u godit nga SPAK dhe Prokuroria e Firences në nëntor të vitit 2024. Ata sillnin kokainë nga Amerika Latine drejt porteve të Livornos, Genoas dhe Savonas e më pas e shpërndante atë në zona dhe grupe të ndryshme të shpërndarjes së drogës në Itali. “Grupi i strukturuar kriminal shërbente si furnizues me shumicë i drogës në tregjet italiane, sasi që vinte me kontejnerë nga Amerika Latine në portet italiane (Livorno, Genova dhe Savona). Ky grup kryente veprimtarinë e nxjerrjes së drogës dhe shpërndarjes së saj, ndërsa ekipet e posaçme kujdeseshin për rikuperimin e lëndës narkotike, nxjerrjen e dërgesave nga zonat portuale si dhe për t’ia vënë në dispozicion grupeve kriminale”, thuhej më tej në njoftim.
Kush është Kreshnik Farruku?
Kreshnik Farruku (Budlla) është një emër i njohur në botën e krimit, i cili ka përdorur 10 emra për t’i shpëtuar drejtësisë, teksa njihet më shumë edhe si Kreshnik Farruku. Në maj të 2019-ës ai është arrestuar në Spanjë, së bashku me vëllanë e tij dhe një tjetër anëtar të fisit. Budlla u prangos në një hotel në Madrid pas disa muajsh hetime dhe ndjekje nga policia, pasi kërkohej në Spanjë dhe Itali për trafik kokaine dhe vjedhje të disa banesave, ndërsa është hetuar edhe për një vrasje po në Spanjë. Sipas medieve spanjolle Kreshnik Budlla dyshohej për vrasjen e bosit të tij në Spanjë, në vitin 2010, për shkak të pazareve të drogës.
Por pas hetimit, prokurorët spanjollë konkluduan se vrasjen e kishte përgatitur Devi Kasmi, i cili mbeti i vrarë në një atentat në janar të 2018-ës në Tiranë. Në maj 2010, Farruku u arrestua së bashku me shtatë anëtarë të tjerë të bandës në Barcelonë me 20 kg kokainë që po përpiqej ta trafikonte në Itali me makinë. Pas prangosjes së tij, ishte vëllai më i vogël, Erniu, që mori udhëheqjen e grupit, por u arrestua dy vjet më vonë në vitin 2012. Në vitin 2014, Kreshnik Farruku u arratis nga burgu ndërkohë që vijoi që të merrej me trafikun e drogës, derisa u arrestua në vitin 2019. Në vitin 2015 Kreshnik Farrukut iu bë një atentat në Shqipëri.
Ai ishte në shoqërinë e kunatit të tij, Rinald Budlla, dhe të dy shokëve, kur është qëlluar me armë në zonën e “Don Boskos”, ndërsa u plagos një kalimtare. Pista asokohe lidhej me prishjen e pazareve të drogës në Itali, Spanjë dhe Holandë. Ndërkohë që në vitin 2012 Gjykata e Durrësit vendosi sekuestro preventive për pasuri të cilat arrijnë shifrën totale rreth 1 milion euro në pronësi të tij. Sipas Prokurorisë këto pasuri dyshohej se ishin krijuar nga aktivitetet e paligjshme të tij dhe përdoreshin nga dy familjarët e tij, Reshit Farruku (babai) dhe Roland Farruku (vëllai të cilit iu bë një atentat në 2014 në Manëz), banues në Shijak të Durrësit. Nga hetimet rezultoi se Reshit dhe Roland Farruku kishin blerë një pronë me vlerë 920.000 euro në zonën e Gjirit të Lalzit, si edhe kishin një llogari bankare në shumën 6.271.000 lekë që u sekuestruan.