Arben Ahmetaj “zgjidh qesen”, kontratë 150 mijë dollarë me kompaninë amerikane për lobim

0
68

Nga Lugano e Zvicrës, Arben Ahmetaj ka nënshkruar kontratën me kompaninë amerikane për të lobuar në kongres dhe agjencitë e departamentit. Shuma që ai do të paguaj është 150 mijë dollarë, ku përfshihen edhe këshillat ligjore. Dokumentet e lobimit, të depozituara nga kompania lobuese e kontraktuar nga Ahmetaj, incidentalisht zbulojnë gjithashtu se ish-zëvendëskryeministri banon aktualisht në Lugano të Zvicrës, qyteza piktoreske e njohur si rezidencë për banka dhe për biznesmenë, në brigjet e liqenit me të njëjtin emër në kufi me Italinë. Dokumenti rezulton të jetë firmosur në 15 janar të këtij viti. Në çdo një muaj pas kësaj, më konkretisht në 1 maj, 1 qershor dhe 1 korrik 2024 do të shlyhen nga 25 mijë dollarë. Qëllimi siç thuhet në dokument do të jetë “të edukojë politikëbërësit mbi akuzat penale të pavërteta të ngritura ndaj klientit nga Qeveria e Shqipërisë”. Po ashtu, Ahmetaj do të marrë edhe këshilla mbi të drejtat ligjore, si dhe do të zhvillohen politika në favor të tij. Një tjetër pikë është lobimi në qeverinë e SHBA, departamentet dhe agjencitë e degës ekzekutive federale dhe Kongresin. Kompania e lobimit të kontraktuar nga Ahmetaj, Prism Group thotë në deklaratën e saj në Regjistrin e Agjentëve të Huaj, FARA në SHBA se ajo “do të advokojë për llogari të dy të huajve: Arben Ahmetaj dhe Erjola Flamur Hoxha, që të dy shtetas shqiptarë”. Deklarata thotë se lobuesit kanë në plan “të kontaktojnë elementë të ekzekutivit dhe legjislativit të qeverisë së shtetit amerikan në përmbushje të detyrimeve kontraktore”. Paralelisht me lobistët në SHBA, Ahmetaj vijon të hetohet në Shqipëri, ndërsa përmes avokatëve ka kërkuar pavlefshmërinë e procedurave të zhvilluara nga SPAK.

Hetimet

Ahmetaj pretendon se është i pafajshëm ndaj akuzave. Në intervistën fundit, ai deklaroi se ka marrë kërcënime me jetë, ndërsa nuk zbuloi se ku gjendej. Ai i kërkoi SPAK të hetojë çështjen e inceneratorit të Tiranës përmes praktikës së “ndjekjes së parave”, ndërsa deklaroi se rezultatet e një hetimi të tillë do ‘t’i tronditin shqiptarët’. “Po qe se do të bëhej një hetim i vërtetë për inceneratorin e Tiranës, shqiptarët nuk do të habiten, por do të llahtarisen se deri ku do të shkojë. Po sigurisht që SPAK nuk e bën këtë. Unë thashë, ‘ndiq paratë’. Unë isha i akuzuar nga opinioni publik pra, në populizmin penal shqiptar, unë po goditesha me gurë nga dritaret e Top Channel, apo nga të gjitha mediat e paguara nga inceneratorët. Mercenarë, vullnetarë, të paguar, të sponsorizuar, të gjithë. Unë habitem se si, kur del nëpër letra se je paguar nga inceneratorët dhe të dalësh të bësh sikur po lufton korrupsioni është çmenduri. Megjithatë ky është një diskutim dhe kapitull tjetër. Pra, po të hetohet Tirana, shqiptarët nuk do të habiten, por të llahtarisen. Do të shkojë shumë lart”, tha ai. Zyrtarisht, SPAK është ende duke hetuar në shumë drejtime skandalin e inceneratorëve, i cili u ka kushtuar shqiptarëve deri më sot minimalisht 150 milionë euro. Veçmas, Ahmetaj akuzohet për abuzim me detyrën në dëm të pronarëve të tokës në rastin e privatizimit të një ngrehine shtetërore që dikur ka qenë fabrikë buke në rrugën 5 maji në Tiranë. Sipas akuzave, Ahmetaj refuzoi të zbatojë një vendim gjykate që i kërkonte të rivlerësonte aksionet që i takonin pronarëve të tokës në kompaninë shtetërore para privatizimit, duke i hequr atyre pjesën dërrmuese të asaj që gjykata i kishte caktuar dhe duke e shitur tokën si aset të kompanisë në ankand.

LEAVE A REPLY

Please enter your comment!
Please enter your name here