Bashkëshortja e ish-komisarit të Policisë Gani Malushi, të vrarë në vitin 2003, Esmaja, është shprehur se është e gatshme të rihapë çështjen që të zbardhet e vërteta.
Komentet Malushi i bëri në emisionin “Review” në Euronews Albania, ku tha se humbja e të shoqit të saj, ishte thikë pas shpine nga kolegët e tij.
Ajo shtoi se institucioni i Policisë së Shtetit është degjeneruar dhe e ka humbur funksionalitetin, për shkak të kapjes nga krimi e korrupsioni i brendshëm.
Kujtojmë se ish-shefi i komisariatit të Fushë-Krujës, Gani Malushi, u qëllua me një breshëri plumbash, duke i shkaktuar vdekjen.
“Bashkëshorti im nuk i hapte rrugë krimit. Krimi të eleminon, por jo kur nuk ka mbështetje. Nuk mundet një kriminel t’i thotë Prokurorit nuk e kishim lënë kështu. Prokuroria është marrë vetëm me kriminelin dhe jo me zinxhirin drejtues të Policisë së qarkut Durrës. Unë e kam bindje, nëse do hapen intervistat e mia, jam shpreh qartë, këtu ka dorë shteti.
Unë kam qenë gati dhe jam gati për të kërkuar drejtësi dhe për të hetuar kolegët e athershëm. Ky emisioni juaj duke marrë shkas edhe nga fjala e ministrit që thotë edhe më përpara kanë ekzistu, unë jam gati të zbardhet e vërteta. Më dhemb shumë, unë jetoj me Policinë, e ndjek përherë, por problemi është se do kohë të gjatë, nuk mund të drejtohet polocia me frymën e vjetër, duhet të ristrukturohet në themel”, është shprehur ajo.