Gazeta Nacionale në Kosovë ka publikuar këtë të hënë një audio-përgjim shefes së grupit parlamentar të Vetëvendosjes, Mimoza Kusari-Lila me deputetin e Listës Serbe, Slavko Simiç. Gazetari Berat Buzhala ka sqaruar se këto regjistrime janë bërë në qershor të vitit të kaluar. Biseda mes Kusari-Lila dhe Slavko Simiqit është bërë në zyrën e shefes së grupit parlamentar të Vetëvendosje.
Ajo që ka shkaktuar reagime të forta në Kosovë është se në hyrje të bisedës, Slavko Simiç i përmend Kusari-Lilës një bisedë që kjo e fundit e ka bërë me Milan Radojiçiç. Ky është një prej njerëzve në “listën e zezë” të SHBA-ve i dyshuar për vrasjen e Oliver Ivanoviçit dhe i dyshuar për dosjen “Brezovica”. Sipas të njëjtave burime Kusari-Lila ndërhyn duke i thënë “3-4 minuta”.
Pra, duke pretenduar se nuk ka biseduar me Radojiçiqin 30-40 minuta, por 3-4 minuta. Gazeta Nacionale raportoi se në përgjimet e tjera që do të publikohen gjatë ditëve në vazhdim Kusari-Lila koordinohet me Listën Serbe për temën e veteranëve, ajo i ofendon kolegët e saj nga partitë e opozitës dhe flet për një letër që Radojiçiç i ka përcjellë shefes së grupit parlamentar të Vetëvendosjes. Slavko Simiç dëgjohet teksa i thotë Kusari-Lilës se “ne që nga fillimi kemi pasur raport partnerësh”.
PJESË NGA BISEDA:
Slavko: “Ti e din që unë të kam lidhë me Millanin, keni bisedu ka 30-40 minuta për me gjetë ndonjë zgjidhje”
Mimoza: “Dy tre minuta”
Slavko: “Një herë keni bisedu gjatë, ku keni bisedu për energjinë në veri, a e mban mend”
Slavko: “Kemi provu me gjetë zgjedhje edhe me ndërtu një raporto partnerësh dhe çfarë ndodhi, njeri që marrim direkt instruksione, që e ka një diapazon të gjanë për secilin prej nesh, pa të cilin nuk mund të bëjmë asgjë… disa vendime që i marrim bashkë me të, nuk mundet me ndiku as Vuçiqi.”
Mimoza: “E kush është kryesori, Rakiq apo?”
Slavko: “Milani bre është kryesori, po çfarë Rakiqi, i cili është veç kryetar i Listës Serbe dhe anëtar i Qeverisë, ama kur të vjen puna për me marrë vendime, për këtë sene nuk ka nevojë as me më pyet sepse t’i kam shpejgu kur kemi bisedu… Njeriu nuk e ka meritu aspak tretmanin që i është bërë, duke e futë në listën e ndalimit”
Mimoza: “Pse po më thua mua?”
Slavko: “Ti mu më ke thënë, ti mu më ke thënë që ki me folë me kryeministrin edhe që kryeministri ka me shiku se për çka bëhet fjalë, që ka me folë edhe me ministren e Drejtësisë edhe me ministrin e Punëve të Brendshme, a është qishtu? Pastaj kur e kemi pasë situatën me zgjedhjet, vetëm po të kthej pak në retrospektivë… edhe ti e ki pamjen e gjanë, asnjë palë zgjedhje nuk kishin me u ba në veri të vendit, mos t’ish kanë Millani edhe heqja e barrikadave, ai nuk është aspak person destruktiv për Kosovën…”
Slavko: “Ti e din që prej fillimit që e kemi pasë një raport partnerësh…, e tash ti mu po më pyet për këtë ligj kur na kena probleme më të mëdhaja.”
Mimoza: “E di Slavko, e di, ama tash krejt këto pika që janë në agjendë e ato nuk mund të hjekën nëse ne nuk votojmë ashtu siç kemi folë ose nëse qeveria nuk tërhiqet…”
Video më poshtë e keni përgjimin e plotë të pjesë së parë.
Në një reagim pas publikimit të audio-përgjimit, Mimoza Kusari – Lila ka pranuar se është zëri i saj në përgjimet që u publikuan që do të thotë se është përgjim autentik. Ajo thotë se biseda ka ndodhur në zyrën e saj në Kuvendin e Kosovës.
“Ai ka ardhur me paramendimin per të më kornizuar ose të më fusë në kurth me incizimet që pastaj munden me i përdorë.” – ka thënë Kusari-Lila në një intervistë në RTV Dukagjini.
Pas publikimit të audiopërgjimit kanë qenë të shumta edhe reagimet e përfaqësuesve të opozitës që kanë kërkuar rrëzimin e qeverisë Kurti.
