Teksa ish-kryeministri Sali Berisha vijon justifikimet e humbjes së thellë dhe këmbëngul se bandat e urdhëruara nga kryeministri Edi Rama ndryshuan rezultatet e zgjedhjeve lokale të në 14 maj, duket se aleatët e tij mendojnë ndryshe. Në një intervistë televizive dje, kryetari i Partisë Republikane, Fatmir Mediu, edhe pse thotë se këto zgjedhje kishin shkelje dhe sipas tij ‘nuk ishin zgjedhje të lira dhe të ndershme’ bën thirrje për reflektim nga opozita me analizë të thellë mbi atë që nuk ka funksionuar. Mediu thotë se mënyra se si u ndërtua koalicioni ‘Bashkë Fitojmë’ nga Berisha dhe Meta bëri që opozita të mos kishte angazhimin dhe sinergjinë e duhur. “Partia Republikanë ka dalë me një rezultat mbi pritshmërinë e saj. Por kemi edhe disa bashki që nuk kemi rezultatin që duhet, kjo edhe për shkak të mungesës së konceptit elektoral nga disa prej drejtuesve të degëve. Duhet thënë se kjo ka qenë një garë e vështirë Partinë Republikane. Kemi qenë gjithmonë aleatë të PD dhe dalja më vetë për këshilltarë dhe angazhimi për kandidatët për kryetarë bashkia dhe kjo ka krijuar keqkuptimet. Kjo vjen edhe për shkak të mënyrës se si është ndërtuar Kodi, i ndryshuar në mënyrë të qëllimshme nga Edi Rama para zgjedhjeve të vitit 2021. Ne jemi renditur si parti e dytë ndër të djathta. Po të ishte Kodi ndryshe nuk do të ishte ky rezultat edhe në mazhoritar, edhe në proporcional. Edhe diferencat brenda PD mund të ishin krejt minimale dhe angazhimi i opozitës do të ishte më i koordinuar. U krijua përshtypje që ishte një koalicion opozitar me emrin ‘Bashkë Fitojmë’. Kjo ishte thjesht një subjekt në koalicionin e madh opozitar”, tha ai.
Mungesë koordinimi me aleatët
Më tej Mediu deklaroi se lista e partive politike opozitare nuk e koordinuan veprimtarinë me kryebashkiakun.“Kandidatët e opozitës mbështesin nga një aleancë e madhe partish, mbi 20 parti. Në mënyre, ca të qëllimshme apo ca mediokre, ata që formëzuan gabim koalicionin ‘bashkë Fitojmë’ e krijuan këtë idenë sikur ishte vetëm ky koalicion. Për më tepër u përpoqën të impononin kandidatët për kryetarë bashkie. Për më tepër lista e partive politike opozitare nuk u koordinuan veprimtarinë me kryebashkiakun dhe pati edhe firo. Po të lexoni rezultatet e votave të kandidatit të Bashkë Fitojmë ka qartësisht më shumë vota se subjekti ‘Bashkë Fitojmë’. Pra ka vota edhe nga partitë e tjera”, tha Kryetari i Partisë Republikane”, u shpreh ai. Ndërkohë i pyetur për deklaratat e Berishës se nuk i njeh zgjedhjet e 14 Majit, Mediu u shpreh se kjo duhet sqaruar se abuzohet me një shprehje të tillë. Ai tha se ‘nuk i njoh’ do të thotë që të mos marrim pjesë në institucionet që u krijuan nga vota e 14 majit, por Mediu tha se kjo votë duhet të respektohet. “Unë kam bindjen se këto zgjedhje nuk janë të lira dhe të ndershme. Por çfarë do të thotë që të mos i njohësh zgjedhjet? Do të marrësh në këshillat bashkiakë apo jo? Do t’i çosh kryebashkiakët që kanë fituar në vendin e punës apo jo? Kjo është pyetja? Ne duhet të respektojmë votuesit e atyre 7 bashkive dhe të bëjmë opozitën në nivel lokal. Sigurisht që do të shkojmë të marrim vendet tona në këshillat bashkiakë. I kanë votuar qytetarët për të qenë në Këshillat Bashkiakë”, nënvizoi Mediu.
Berisha: Bandat e Edi Ramës ndryshuan rezultatin e zgjedhjeve
Por ndryshe nga Mediu, mendon ish-kryeministri Sali Berisha. Ky i fundit ka dalë dje në një deklaratë për mediat duke hedhur akuza për përdorimin e bandave në fushatën elektorale. Kryefoltoristi Berisha theksoi Edi Rama ka bërë gjithçka për të ndryshuar rezultatin e zgjedhjeve në shumë zona të vendit. Ai paralajmëroi se qytetarët do ta marrin vesh me hollësi shkeljet që janë bërë më 14 maj. “Analiza dhe mbledhja e dokumenteve, dëshmive, fotografive, filmimeve fakton në mënyrë të pakundërshtueshme ndërhyrjet brutale antikushtetuese dhe antiligjore të Edi Ramës në kontrollin e votës së zgjedhësve shqiptarë. Dokumentet faktojnë se në Shkodër u bashkuan bandat me armiqësinë më të egër ndaj njëra-tjetrës të urdhëruara nga krye-Kumbara, Edi Rama. Bandat e Edi Ramës bënë gjithçka për të ndryshuar rezultatin e zgjedhjeve në shumë e shumë zona të vendit. Por bandat ishin një shkrirje me bandat e qeverisë, inxhinierë, drejtorë e punonjës kanë ushtruar terror ndaj qytetarëve me kërcënimin: “Votën ose jetën!” Delinkuent të dënuar rëndë në vendin përreth si përdhunues, kanë shoqëruar deputetë të PS dhe janë vendosur numërues në qendrat e numërimit. Në qendra të tjera, qytetarët janë detyruar të mos futen fare në dhomën e fshehtë, sepse kanë marrë fletën e mbushur nga komisioneri. Këto janë vetëm disa nga rastet e panumërta që dëshmojnë dhunimin flagrant të së drejtës së shqiptarëve në këtë proces farsë elektorale”, deklaroi Berisha.
