Të kuqtë janë optimistë se mund ta përmbysin Tiranën, për të bërë të vetin kryesimin dhe për të fituar titullin. Natyrisht që një farë të drejte e kanë, pasi humbja e Tiranës në Durrës me Teutën dhe ngushtimi me dy pikë në kryesim, i kanë dhënë zemër ekipit të Partizanit, të cilit tani i duhet thjeshtë të fitojë derbin që të marrë vendin e parë në renditje dhe të shndërrohet në favoritin kryesor për titull. Ndërkohë, Partizani ka kryer ditën e djeshme stërvitjen e radhës, ndërkohë që ngarkesat nga ana e trajnerit Kolela nisin të rriten gradualisht, me qëllim mbërritjen në derbi në formë sa më optimale. Ditën e djeshme në stërvitje kanë qenë të gjithë lojtarët, por disa nuk janë stërvitur normalisht. Andi Hadroj është lojtari më i aktivizuar në këtë sezon dhe kjo pa dyshim që ka ndikuar edhe në fizikun e tij. Ai në ndeshjet e fundit nuk është parë kushtet maksimale dhe arsyeja ka qenë lodhja fizike, që është shkaktuar prej aktivizimit të vazhdueshëm. Ditën djeshme ai e ka lënë stërvitjen në gjysmë. Mbrojtësi ka shfaqur një shqetësim fizik dhe për ta ruajtur, stafi teknik e ka lënë pushim. Burime nga skuadra bëjnë me dije se mbrojtësi ka vetëm një ngarkesë muskulore dhe i duhet pak pushim, që e ka luksin ta marrë. Edhe sot ai pritet të mos stërvitet me shokët. Probleme mësohet se ka edhe Matondo, i cili ka marrë një goditje, por as ai nuk e rrezikon sfidën me Tiranën. Ndërkohë, ngarkesë nuk i është dhënë as Da Silvës, i cili është stërvitur gjithashtu i veçuar.
Kampionati i moshave, Fieri e Tirana bëjnë “ligjin” tek U-14 dhe U-15
Sikurse raportojnë mediat sportive më afër federatës, turneu i përfaqësueseve rajonale që organizohet nga FSHF, uli siparin këtë të enjte me tri takimet finale për tri grupmoshat e ndryshme: U-13, U-14 dhe U-15. Për herë të parë, ndeshjet finale për grupmoshat e ndryshme u zhvilluan në fushat e ‘Shtëpisë së Futbollit’ në Tiranë. Shkodra-Fieri ishte ndeshja finale e grupmoshës U-13, një takim i fituar nga fierakët e vegjël. Të dyja ekipet dhuruan paraqitje fantastike dhe spektakël në fushën e lojës gjatë 60 minutave të lojës. Ndeshja u vendos nga penalltitë, pasi koha e rregullt u mbyll me rezultatin 0-0. Fierakët u shpallën kampionë të kësaj grupmoshe, duke triumfuar 4-1 me 11-metërsha. Në finalen e grupmoshës U-14, Fieri-Durrësi, djemtë e vegjël të detit u shpallën fitues të kësaj grupmoshe. Pas një ndeshjeje shumë të luftuar nga të dyja ekipet. Pjesa e parë u mbyll me rezultatin 0-0, teksa të dyja ekipet krijuan shumë raste. Në minutën e 55-të të fraksionit të dytë, Mustafaj gjeti golin e triumfit për durrsakët. Pas një goditjeje dënimi, që i shpëtoi nga duart portierit fierak. Mjaftoi vetëm ky gol që ekipi rajonal i Durrësit të ngrinte trofeun e kampionëve për grupmoshën U-14. Në takimin e vlefshëm për grupmoshën U-15, Tirana-Fieri, kryeqytetasit u shpallën kampionë, pasi triumfuan me rezultatin 3-0 ndaj fierakëve të vegjël. Golat e kësaj sfidë u shënuan nga Ademi në minutën e 10-të dhe Matraku e Zhegu në minutat 45-të dhe 65-të.
