Partizani fitoi me vështirësi përballë Bylisit në duelin e djeshëm përmbyllës të javës së 30-të të Kategorisë Superiore, duke marrë një trepikësh me mjaft vlerë për objektivat e tij sezonalë, pasi e afron ndjeshëm me Tiranën kryesuese, në 5 pikë dhe e mban të hapur garën për titullin kampion në kampionatin shqiptar. Ishte një ndeshje e vështirë për të kuqtë, që e nisën mirë takimin me gol, por u barazuan brenda pjesës së parë, ndërsa në pjesën e dytë shënuan golin e epërsinë dhe të fitores, duke e mbyllur 2-1 dhe duke iu afruar ndjeshëm skuadrës kryesuese të kampionatit, Tiranës. Padyshim ë kjo fitore e mban në lojë Partizanin, ndaj “demat e kuq” nuk e kanë humbur shpresën për titullin edhe pas kësaj xhiroje të kampionatit elitar shqiptar.
Ndeshja
Duke qenë skuadër pritëse, partizanit i duhej të bënte maksimumin në këtë ballafaqim, por hasi në vështirësi, pasi ballshiotët, të gjendur të parafundit dhe në pozita shumë të vështira në klasifikim, kërkonin rezultat pozitiv, pra synonin të dilnin me pikë. Partizani ushtroi presion që në minutat e para në gjysmëfushën e ballshiotëve, por episodi i parë për t’u shënuar u regjistrua në portën e të kuqve, me portierin Rexhepi që shmangu një autogol të Mba, në zhvillimet e një këndoreje. Gjithsesi, në minutën e 18-të do të vinte goli i parë i sfidës, i shënuar nga Rrapaj, pas një aksioni personal. Nuk vonoi shumë dhe Bylisi (35’) gjeti golin e barazimit. Trumçi hodhi një kros drejt zonës, ku Esquerdinja nuk hezitoi për ta dërguar me kokë topin në rrjetë. Partizani, sigurisht nuk mund të pajtohej me një pikë. Në fillim të pjesës së dytë Rrapaj fitoi një 11-metërsh, të cilën e shndërro në gol Da Silva. Ky rezultat nuk ndryshoi në minutat e mbetura, me Partizanin që mban gjallë shpresat për titullin kampion, ndërsa Bylisi duhet të shtrëngojë fort dhëmbët në gjashtë javët e mbetura për të siguruar mbijetesën.
Deklarata/ Kolela: Problemi është si të ndalim Tiranën në kryesim
Trajneri i Partizanit, Xhovaji Kolela, tha pas takimit se ishte i kënaqur me fitoren dhe tri pikët, ndërsa la mënjanë Bylisin që u mund dhe e përqendroi vëmendjen tek Tirana, që sipas tij në këto gjashtë javcë të mbetura duhet të humbasë e të frenohet. “E kam thënë para dhe pas ndeshjeve me ta. Bylis them se është një nga skuadrat që luan futboll më mirë në kampionat. Nuk e meriton që të bjerë nga kategoria. Ju kujtoj të gjithëve që jemi 5 pikë larg nga kreu me 6 javë nga fundi dhe nuk janë pak. Nuk jemi perfekt, por nuk jemi kurrë perfekt. Çfarë të ndryshojmë? Ndryshimi është që Tirana të humbasë ndonjë pikë. Nuk kemi bërë keq ndaj Laçit, nuk është se bëmë ndeshje të shëmtuar. Sot kemi bërë një ndeshje të mirë. Nga e diela kur të shkojmë në transfertë, do të marrim me vete VAR-in tonë, se me sa duket VAR-i ynë funksionon më mirë se i të tjerëve. Se shkojnë dhe e përdorin, ndërsa te të tjerët jo, ndaj do e marrim me vete në autobus”, tha në fund me ironi trajneri i Partizanit, Kolela. 5 pikë mbetet diferenca me Tiranën kryesuese dhe kjo e shqetëson teknikun e Partizanit.
Java 30
Të shtunën
Vllaznia-Tirana 0-1
Egnatia-Laçi 1-1
Teuta-Erzeni 2-0
Të dielën
Kastrioti-Kukësi 1-0
Partizani-Bylis 2-1
Renditja
Nr.Ekipi pikë
1.Tirana 56
2.Partizani 51
3.Egnatia 43
4.Vllaznia 42
5.Laçi 40
6.Teuta 38
7.Erzeni 38
8.Kukësi 36
9.Bylis 33
10.Kastrioti 31