Napoli ka lënë pas dështimin e javës së kaluar në kampionat ku u mund me shifrat 4-0 nga Milani. Skuadra e Spaletit ka siguruar një fitore të vështirë në transfertë përballë Leçes, ku në momentin vendimtar të sfidës e ndihmoi edhe fati.
Napolitanët sulmuan dhe gjetën shpejt golin e avantazhit me anë të Di Lorencos. Por më pas ata u tërhoqën për të administruar forcat duke menduar për sfidën e Champinos dhe Leçe nisi të sulmonte pareshtur.
Skuadra vendase barazoi shifrat në fillimin e pjesës së dytë dhe kërkoi me ngulm avantazhin, por u godit në momentin më të mirë kur një ndalim i gabuar i Galo dhe gabimi i portierit Falkne, bënë që topi të ndalej në rrjetë.
Kjo ia bëri më të thjeshtë minutat e mbetura Napolit që iu afrua disa herë golit të tretë, teksa u mbrojt më me rregull për të marrë tri pikë të vështira por shumë të rëndësishme që afrojnë edhe më shumë titullin për ekipin kryesues të Serisë A.
