Vizita e befasishme e presidentit amerikan Joe Biden në Kiev u pasqyrua edhe nga mediat ruse, të cilat, siç pritej, arritën në përfundimin se tregon se Biden është ai që menaxhon gjithçka në Ukrainë. Në fund të fundit, kjo është narrativa që Kremlini dëshiron të bindë popullin e tij dhe pjesën tjetër të botës që nga fillimi i pushtimit rus të Ukrainës. Në 60 Minutes, një talk show popullor në Rusi, ata pyetën nëse Rusia kishte garantuar sigurinë për Biden gjatë vizitës së tij, për të cilën një nga të ftuarit u përgjigj si më poshtë: “Mund ta kishim vrarë Bidenin, por kjo do të ishte shumë”. Një ish-këshilltar i presidentit Putin, Sergei Markov, i tha Sky News se Rusia nuk u përpoq të vriste presidentin amerikan sepse kishin frikë se do të fillonte një luftë bërthamore. Kujtojmë se Joe Biden mbërriti dje në kryeqytetin ukrainas Kiev, duke sfiduar kërcënimet e sulmeve me raketa ruse, për të njoftuar dërgesa të rëndësishme shtesë të armëve amerikane ndërsa Ukraina përgatitet të shënojë përvjetorin e errët të pushtimit në shkallë të plotë të Rusisë. Presidenti amerikan, i rrethuar nga afër nga një eskortë e madhe sigurie, shoqërohej nga Zelensky në shëtitjen e tij në qendër të Kievit, ndërsa dëgjoheshin sirenat ajrore, duke konfirmuar zërat për vizitën që qarkullonin gjatë mëngjesit. Presidenti ukrainas Volodymyr Zelensky postoi në Telegram një foto me presidentin amerikan Joe Biden në Kiev, me mesazhin “Biden, mirë se erdhe në Kiev! Vizita juaj është një shenjë jashtëzakonisht e rëndësishme e mbështetjes për të gjithë ukrainasit”.