Java e 22-të e Kategorisë Superiore u mbyll ditën e djeshme me dy takime, ku Tiran fitoi në Krujë ndaj Kastriotit 1-0 dhe Egnatia ndali Vllazninë në Rrogozhinë 0-0. Me këto dy duele xhiro e 22-të konfirmoi Tiranën si skuadra pretendente e garës, por edhe ngjitjen e shpejtë të Partizanit në vend të dytë dhe rihapjen e duelit kryeqytetas për titullin kampion. Kuptohet, e treta në radhë vjen Vllaznia, e cila ka një ecuri të mirë, por për skuadrën shkodrane janë karakteristike oshilacionet në lojë e rezultate, gjë që e ka pranuar edhe vetë trajneri Mirel Josa. Pas javës së 22-të bardheblutë udhëheqin me 40 pikë, 3 pikë më shumë se Partizani i vendit të dytë dhe 5 pikë më shumë se Vllaznia e vendit të tretë. Më shumë sesa pikët dhe pozicionet në renditje, është për t’u evidentuar fakti se Tirana dhe Partizani po e marrin veten shpejt pas largimeve të shumta e cilësore dimërore. Partizanit i ikën disa lojtarë dhe skuadra pati disa javë që nuk fitonte, por në dy xhirot e fundit i ka bërë gjërat mirë dhe në rrugën e duhur.
Tirana, fitore me vlerë ndaj Kastriotit
Tirana fitoi minimalisht 0-1 në transfertë ndaj Kastriotit. Bardheblutë e trajnerit Orges Shehi rikthehen te suksesi pas humbjes në Shkodër me Vllazninë, teksa autori i golit ishte Dijar Nikqi në minutat shtesë të pjesës së dytë. Sa i takon sfidës, në minutën e 13-të, edhe me ndihmën e VAR, kryeqytetasit fituan një penallti teksa nga pika e bardhë Florent Hasani gaboi. Sulmuesi u “hipnotizua” nga portieri Sali që kuptoi krahun dhe shpëtoi skuadrën e tij nga goli. Në vijim të dyja skuadrat kërkuan me ngulm golin por pa mundur të konkretizonin në portat respektive. Të dyja ekipet mbetën me 10 vetë pasi në të 80-tën, me Çelën që i vendosi duart në fyt Hasanin me sherrin që përfshiu të dyja kampet. Çela dhe Aleksi dolën me të kuq me rezultatin që ndryshoi më pas në fund falë golit të Nikqit në minutën e 100-të. Pas kësaj ndeshje, Tirana ruan kryesimin me 40 pikë ndërsa nga ana tjetër, Kastrioti mbetet në vendin e fundit me 21 pikë.
Vllaznia ngec në Rrogozhinë, i largohet kreut
Në ndeshjen tjetër, Vllaznia ngec në një barazim pa gola në transfertë ndaj Egnatias. Pas triumfit me Tiranën, shkodranët nuk ia dolën të ruajnë vazhdimësinë dhe në Rrogozhinë nuk mundën të konkretizonin ndërsa vendasit patën gjithashtu mundësi për të fituar teksa Xhekson u ndal nga shtylla. Në fund, kuqeblutë duhet të kënaqen me një pikë teksa ruajnë vendin e tretë me 35 pikë ndërsa Egnatia mban vendin e katërt me 31 pikë. Java e 22-të mbyllet kështu me surpriza jo të pakta, por edhe me një konfirmim të skuadrave të mëdha, ndërkohë që Kukësi, ekip që prej gati nj dekade ka qëndruar në elitë me pretendime, ndodhet në vend të parafundit dhe mjaft i rrezikuar për të rënë këtë sezon nga kategoria. Kuksianët nuk po e kalojnë dot ngërçin e krijuar, nuk kanë aftësi të përtërihen dhe kanë pak pikë, duke mbetur në vend të parafundit, bashkë me Kastriotin, që edhe pas kësaj xhiroje mbajnë vendet e fundit dhe rrezikojnë më shumë se skuadrat e tjera të bien nga kategoria.
Java e 22-të
Të shtunën
Partizani-Erzeni 3-0
Teuta-Kukësi 1-0
Laçi-Bylis 0-1
Të dielën
Egnatia-Vllaznia 0-0
Kastrioti-Tirana 0-1
Renditja
Nr.Ekipi Pikë
1.Tirana 40
2.Partizani 37
3.Vllaznia 35
4.Egnatia 31
5.Erzeni 31
6.Laçi 29
7.Teuta 28
8.Bylis 26
9.Kukësi 25
10.Kastrioti 20