Paris San Zhermen nuk po duket skuadër bindëse në Champions League, por në kampionatin francez po tregon superioritet, dëshmuar me lojë e rezultate, plus që ka “yjet” në gjirin e ekipit. Dje fitoi një duel të vështirë me Lilën, por më shumë se fitorja vëmendjen e mori ekzekutimi i goditjes së dënimit nga Mesi, shndërruar në një supergol. Kështu, një gol nga gjuajtja e lirë nga shtatë herë fituesi i Topit të Artë ia siguroi pikët e plota PSG-së në përballjen e vështirë në shtëpi ndaj Lilës. Parisienët arritën të triumfonin 4:3 në duelin e vlefshëm për javën e 24-të në Ligue 1. Mbape e Nejmar i dhanë epërsinë e dyfishtë PSG-së në minutat 11-të dhe 17-të. Por, më pas ishte “shou” i Lilës. Diakite ngushtoi epërsinë në minutën e 24-të, para se David të barazonte rezultatin ende pa u mbushur një orë lojë. Në të 69-n Bamba përmbysi gjithçka dhe kaloi mysafirët në epërsi. Mbape arriti të barazonte rezultatin në 3:3 në minutën e 87-të. Por, në sekondat e fundit të ndeshjes, Leo Mesi shënoi një gol fantastik nga gjuajtja e lirë, për t’i ndalë pikët e plota në “Parkun e Princave”. Futbollisti kosovar, Edon Zhegrova ishte zëvendësues i pashfrytëzuar nga trajneri Fonseka në këtë përballje. Me këtë fitore, tani PSG shkon në kuotën e 57 pikëve në vendin e parë, tetë më shumë se Marsejë që ka një ndeshje më pak të luajtur. Fitorja ishte e mirë, por trajneri Galtier nuk i kurseu kritikat. “Për 40 minuta nuk ishim fare prezent në ndeshje, e pamundur të mohohet. Është e papranueshme të ndodhë kjo gjë në këtë fazë të sezonit”, u shpreh Galtier. PSG kryeson kampionatin me diferencë pikësh nga Monako. Fokusi është te ndeshja e kthimit ndaj Bajern e Mynihut. PSG humbi 0-1 në “Parc des Princes” dhe do të tentojë përmbysjen e kualifikimin në çerekfinalet e Champions League në Bavari (8 mars). Ndërkohë, përveç lajmit të mirë të fitores dhe rikthimit në vallen e pretendimeve, por edhe si moral para ndeshjes në Champions, për Paris San Zhermen pati dhe një lajm të hidhur nga ndeshja e djeshme. E pranojnë madje dhe mediat sportive franceze se është një alarm te skuadra e PSG-së ka pasur të dielën, pasi njëri prej lojtarëve më të mirë të skuadrës, Nejmar, është dashur të largohej nga fusha e lojës me barele. Nejmari është lënduar rëndë në duelin kundër Lilës të Edon Zhegrovës. Ai u zëvendësua në minutën e 51-të. Zhegrova është në bankën rezervë, ndërsa pas 70 minutave lojë, rezultati është 3:2 në të mirë të Lilës. Nejmari është në dyshim për të luajtur edhe në Ligën e Kampionëve kundër Bajernit. “Ai pësoi një ndrydhje. Nuk e dimë sa serioz është dëmtimi i tij. Të presim analizat”, deklaroi trajneri i PSG-së Galtier.