Në kampionatin anglez luajnë disa futbollistë shqiptarë, por më kryesori që është pjesë e përfaqësueses, Armando Broja, është dëmtuar dhe duket se i ka humbur të gjitha ndeshjet e këtij sezoni. Futbollisti pësoi lëndim të meniskut dhe do të mungojë gjatë, mungesë që e ndjen shumë skuadra e tij, Çelsi. Në Angli luajnë edhe Strakosha, Manaj, Mehmeti e ndonjë tjetër, por më i miri nga të gjithë është lojtari që luan për Zvicrën Granit Xhaka, cilësia dhe lidershipi i të cilit po mbajnë në kryesim të Premier League skuadrën e Arsenalit. Xhaka, – shkruajnë mediat angleze, – është personaliteti i vërtetë i “topçinjve” dhe lojtari që e udhëheq këtë skuadër drejt objektivit titull në Angli.
Ndeshja dhe sjellja e Xhakës
Granit Xhaka mori kartonin e 56-të të verdhë në Premier League, të shtunën në ndeshjen ndaj Aston Vilës. Dhe kartonin e mori pasi u zëvendësua. Mesfushori 30-vjeçar i Arsenalit është mësuar që të ndëshkohet me të verdhë nga gjyqtarët gjatë karrierës në Angli. Por në “Villa Park”, të shtunën, Xhaka u largua nga fusha në minutën e 79-të, pa “e shkruar” emrin e tij në letrën e arbitrit Simon Hoper. Kjo megjithatë nuk e ndali Xhakën që të ndëshkohet me karton të verdhë, shkruan “The Sun” të dielën. Zhorzhinjo dërgoi goditje mjeshtërore në minutën e 93-të. Topi qëlloi traversën dhe më pas shkoi në kokën e portierit Emi Martinez, për të përfunduar në rrjetë. Kështu Arsenali po e siguronte fitoren shumë të nevojshme ndaj Vilës. Të gjithë tek Arsenali festuan golin e shënuar me shumë fat, duke përfshirë Zhorzhinjon. Xhaka natyrisht nuk deshi të mbetej pa festuar. Ai vrapoi në mes të fushës deri te këndi ku ishin lojtarët e Arsenalit, që po festonin para tifozëve pasionantë nga Londra. Pasi festoi me bashkëlojtarët, Xhaka u nis për t’u kthyer në bankinë, ndërsa arbitri ia tregoi kartonin e verdhë. Xhaka u kthye sërish në mes të fushës për në bankinë, por fillimisht duke pranuar vendimin e arbitrit për ta ndëshkuar.
Tifozët të gjithë në krah të Xhakës
Sipas “The Sun”, tifozët në rrjetet sociale kanë pëlqyer skenën dhe kanë lavdëruar Xhakën për përkushtimin ndaj skuadrës. Arsenali mori fitore të vështirë, 4:2, ndaj Vilës. Me këtë fitore, Arsenali është kthyer në krye të tabelës. Një tifoz shkroi: “Xhaka është dashur të vrapojë nga banka për të festuar këtë gol. Çfarë ekipi i jashtëzakonshëm është ky”. “Çfarë dite – Xhaka ia doli të festojë në anën e kundërt të fushës pasi u zëvendësua. Kjo është brilante”, ka shkruar një tjetër tifoz. “Gjëja më e bukur nga të gjitha videot e festimit të golit të tretë është që Xhaka është dashur të vrapojë gjithë fushën për t’u bashkuar në festë”, ishte një koment tjetër, për të vazhduar me: “Xhaka është lider kështu që duhet të festojë me bashkëlojtarët”. Arsenali ka 54 pikë nga 23 ndeshje. Mançester Siti është në vendin e dytë me 52 pikë nga 24 ndeshje. Siti lëshoi pikë të shtunën, pasi Arsenali mori fitoren e madhe tek Aston Vila. Gara për titull në Premier League vazhdon të jetë shumë e fortë.