Kategoria e Parë vijon të dhurojë surpriza të shumta me lojën dhe rezultatet që prodhon kampionati, i cili deri tani ka dëshmuar se ka shumë rivalitet, sidomos për garën për dy vendet e para që kanë të drejtën e ngjitjes në elitë. Dinamo merr një goditje në Kategorinë e Parë me blutë që u mposhtën në transfertë me Burrelin. Kryeqytetasit u penalizuan nga një gol i Ferrukut në minutën e 65-të të pjesës së dytë, teksa rihapen edhe një herë llogaritë për vendin e parë duke qenë se rivalët e Dinamos ia dolën të fitonin në këtë javë të 16-të. Skënderbeu nuk fali në shtëpi duke mposhtur me rezultatin 4-1 skuadrën e Orikut. Juglindorët shënuan nga dy gola për pjesë teksa ai që hapi llogaritë e sfidës ishte Abdeen Temitope në minutën e 29-të teksa në të 41-tën shënoi Abubakari. Në fraksionin e dytë, Dede shënoi për miqtë megjithatë, bardhekuqtë ishin të vendosur për të dalë me pikët e plota teksa gjetën rrugën e rrjetës me anë të Peskanit dhe Vecajt. Pas kësaj fitoreje, Skënderbeu ngjitet në kuotën e 30 pikëve në vendin e dytë, një më pak se Dinamo kryesuese. Nga ana tjetër, Oriku është në vendin e 12-të me 15 pikë. Në ndeshjet e tjera, Apolonia dhe Besa barazuan pa gola me fierakët që mbeten në vendin e 10-të me 18 pikë ndërsa kavajasit janë në vend të pestë me 24 pikë. Ndërkohë, Luzi mposhti me rezultatin minimal 1-0 Korabin teksa goli vendimtar u shënua nga Treni në minutën e 47-të të pjesës së parë. Pas këtij suksesi, Luzi është në vend të gjashtë me 21 pikë ndërsa Korabi mbetet me 26 pikë në vend të katërt. Duhet thënë se gara në Kategorinë e Parë do të vijojë të jetë e fortë deri në fund, pasi ka surpriza në lojë e rezultae për shumë ekipe dhe ka disa skuadra që pretendojnë të ngjiten në elitë, përfshi këtu Dinamon, Skënderbeun, Flamurtarin, Lushnjën, Korabin e ndonjë tjetër.