Ndeshjet e Kategorisë së Parë po dhurojnë emocione të shumta, nisur jo vetëm nga rivaliteti i shumë skuadrave për kreun, por më së pari nga pozitat dhe pikavarazhi që kanë ekipe në renditje. Kuptohet, Dinamo e Flamurtari janë pretendente për tu ngjitur në Superiore, por ka skuadra që deri tek vendi i pestë e pretendojnë këtë gjë, sepse janë afër me pikë. Ndërkohë, dje, Besa e Kavajës kthehet te fitorja në kampionatin e Kategorisë së Parë pas dy barazimeve dhe një humbjeje në tri sfidat e fundit. Skuadra kavajase mposhti 2-0 Besëlidhjen e vendit të fundit dhe shkon në kuotën e 23 pikëve në vendin e pestë, vetëm tri pikë më pak se Flamurtari i vendit të dytë. Në këtë takim të javës së 15-të të luajtur në Berat vendosën golat e Onuh dhe Hoxhës. I pari u shënua në fundin e pjesës së parë, ndërsa finalizimi që vulosi suksesin e kavajasve u realizua sapo nisi koha shtesë. Rezultat paksa befasues në sfidën tjetër të zhvilluar mes Turbinës dhe Apolonisë, e mbyllur me fitoren minimale të skuadrës cerrikase me golin e Jusuf në minutën e 58-të. Turbina me këtë fitore la pas në vendin e fundit Besëlidhjen, ndërsa Apolonia, me 17 pikë të grumbulluara, duhet të mendojë ende për mbijetesën.
