Presidenti i Serbisë Aleksandër Vuçiç, në takimin e tij me ambasadorin e Rusisë në Beograd, Aleksandar Bocan-Kharchenko, ka thënë ditën e djeshme se vendi i tij do të vazhdojë miqësinë me Rusinë dhe Kinën. “Serbia do të vazhdojë të ruajë miqësitë dhe partneritetet tradicionale me Rusinë dhe Kinën”, thuhet në deklaratën e Presidencës. Sipas tyre, në takim është diskutuar për rritjen e marrëdhënieve serbo-ruse. “Në takim u bisedua për zhvillimin e mëtejshëm të marrëdhënieve dypalëshe serbo-ruse, duke përfshirë fushën e energjisë, me shpresën se së shpejti do të fillojnë bisedimet për sasitë, çmimet dhe kushtet e tjera të furnizimit me gaz”, përfundon njoftimi. Serbia është ndër shtetet e vetme europiane që nuk i kanë vendosur sanksione Rusisë, ndërsa Bashkimi Europian vazhdon të ketë qasje shumë konstruktive karshi Beogradit zyrtar. Presidenti pro-rus dhe autokrat i Serbisë në anën tjetër vazhdon të kultivojë marrëdhënie të mira më Kinën dhe me Rusinë, shtete të cilat janë krejtësisht kundër agjendës së vendeve perëndimore. Në Beograd gjithashtu, serbët kanë organizuar protesta kundër NATO-s dhe pro pushtimit të Ukrainës nga Rusia. Mijëra persona u mblodhën së fundmi në qendër të Beogradit me flamuj rusë për të treguar edhe njëherë mbështetjen pro Rusisë. Tubimi, i quajtur “Jo në emrin tim” kishte për qëllim të kundërshtonte votën e javës së kaluar të ambasadorit serb në OKB për përjashtimin e Rusisë nga Këshilli i të Drejtave të Njeriut. Demonstruesit shpalosën një flamur trengjyrësh 20 metra të gjatë, i cili nga një kënd dukej si flamuri i Rusisë, dhe nga tjetri si flamuri i Serbisë, duke brohoritur “Serbët dhe rusët vëllezër përgjithmonë”.
