Java e 29-të e Kategorisë Superiore u mbyll dje me rezultate disi surprizuese, për faktin se Partizani që u ndesh me vendin e fundit të renditjes (Skënderbeun) mori vetëm një pikë dhe tani rrezikon objektivat sezonalë, ndërkohë që Vllaznia i iku fitorja nga duart në minutat e fundit me Teutën, në Durrës, duke bërë që të dyja skuadrat të merrnin nga një pikë, krejt të pamjaftueshme për objektivat që kanë. I vetmi i fituar nga ndeshjet e djeshme ishte Laçi, që mundi 2-1 Dinamon, duke e zhytur më keq “nëndetësen” drejt Kategorisë së Parë, e me trepikëshin e djeshëm të forconte pozitat e veta si vend dytë në renditje, pozicion që të çon automatikisht në ligat e Europës.
Vllaznia flirton me fitoren, por Teuta barazon në sekondën e fundit
Vllaznia e nisi më mirë ndeshjen, duke rrezikuar në minutat e para, por Teuta kundërpërgjigjet me L.Vilën, por sulmuesi gjithsesi ishte në pozicion jashtë loje, ndërkohë që në minutën e 36-të, Hebaj nuk devijon në rrjetë një top të Jazxhi. Në ekstremin e pjesës së parë, sërish L.Vila kishte një mundësi flagrante, mirëpo në fund sulmuesi gaboi dhe e dërgoi topin shumë larg kuadratit. Në fraksionin e dytë, Vllaznia pretendon për një penallti dhe nëpërmjet VAR akordohet penalltia, të cilën në minutën e 60-të e kthen në gol Liridon Latifi. Kur dukej se ndeshja do të mbyllej me fitoren e Vllaznisë, Teuta gjeti golin e barazimit me anë të mbrojtësit Ivanoviç, ndërkohë që më pas nuk pati kohë për të ndryshuar fatet e takimit.
Laçi fiton, “nëndetësja” dinamovitë pothuajse zbret në Kategorinë e Parë
Laçi është rikthyer te fitorja pas shtatë javëve në kampionat dhe pas tre javëve që nga ndeshja e fundit me Teutën në kupë, ndërsa ka ndëshkuar më tej ekipin e Dinamos që tashmë duket pa asnjë shpresë. Kurbinasit morën avantazhin e kësaj përballjeje që në sekondën e 33-të të sfidës, me Saliou Guindo që shënoi për vendasit. Pjesa e parë e kësaj përballjeje u dominua totalisht nga vendasit, ndonëse 45-minutëshi i parë u mbyll me rezultatin 1-0. Në pjesën e dytë Dinamo do të kthehej më kërkues dhe do të vendoste në disa raste në vështirësi Dajsinani dhe mbrojtjen e Laçit, ndërsa në minutën e 60-të Devid Fejzulla, që bëri sot edhe ndeshjen debutuese për sezonin 2021-2022, do të shënonte golin e barazimit. Megjithatë ky barazim do të zgjaste deri në minutën e 87-të, ku Dejan Zarubica do të shënonte nga pika e bardhë e penalltisë dhe do t’i jepte fitoren kurbinasve, me penalltinë që u fitua nga Shehu pas një ndërhyrjeje në zonë nga Rexhinaldo. Pas takimit të raundit të 29-të të “Abissnet Superiore” Laçi shkon në kuotën e 50 pikëve në vend të dytë, teksa Dinamo rrënohet në kuotën e 23 pikëve në vendin e nëntë, e tani pothuajse edhe matematikisht e rënë nga kategoria.
