Kategoria Superiore ka hyrë tashmë në fazën e saj të verdikteve, edhe pse kampionati ka ende shumë xhiro deri në fund. Por Tirana e shkëputur me 6 pikë në klasifikim ka shanse maksimale për të fituar titullin kampion. Por gara për titullin mbetet e hapur, pasi Laçi është vetëm 6 pikë larg, e po ashtu dhe Kukësi e Vllaznia që janë respektivisht 8 dhe 10 pikë. Duke pasur parasysh formulën e garës, ku ka shumë përplasje direkte, atëherë gara për titull mund të konsiderohet e hapur në 16 javët e mbetura. Pas largimit të trajnerit Ilir Daja dhe emërimit në vend të tij të Dritan Mehmetit, edhe Partizani ka bërë hapa përpara dhe tani është në rrugën e duhur për t’i realizuar objektivat e veta. Në fakt, Partizani mund ta realizojë këtë objektiv kryesisht nga Kupa e Shqipërisë, ku ka mundur të shkojë në gjysmëfinale dhe ka shanse reale që ta mbyllë sezonin me trofe dhe me pjesëmarrje në kompeticionet e UEFA-s. Kapja e zonës europiane nga kampionati duket më e vështirë, pasi skuadra është prapa me pikë nga Tirana kryesuese.
Situata në kampin e kuq
Ecuria e Partizanit duhet parë me etapa, njëlloj si situata e kampionatit aktual. Është një sezon i vështirë, larg objektivave në kampionat, një nisje jo e mirë e vitit 2022, por në tre ndeshjet e fundit, Partizani njeh vetëm fitore, duke marrë terren në renditje dhe duke prekur fazën gjysmëfinale në Kupën e Shqipërisë. Suksesi i fundit, në Korçë, përballë Skënderbeut ishte treguesi i vërtetë se “të kuqtë” nuk janë dorëzuar dhe kërkojnë të ndryshojnë kurs, krahasuar me gjysmën e parë të sezonit. Një përmbysje karakteri në stadiumin “Skënderbeu”, me protagonist absolut sulmuesin, Xhuliano Skuka, të besuarit e Mehmetit koleksionuan fitoren e dytë radhazi në kampionat dhe të tretën në seri. Ecuria pozitive e kishte zanafillën pikërisht në suksesin e arritur ndaj Teutës, në ndeshjen e fituar nga kryeqytetasit 4-0, ku për herë të parë në këtë edicion, “demat” shënuan katër gola në një ndeshje, më pas triumfi ndaj Dinamos në kupë, që i siguroi Partizanit biletën për në gjysmëfinale dhe në fund përmbysja ndaj Skënderbeut, në një takim ku skuadra e Mehmetit shpalosi të gjitha cilësitë, duke interpretuar një nga ndeshjet më të mira në këtë sezon. Momentalisht, Partizani numëron shtatë fitore, katër prej të cilave në transfertë, ndërsa sa i përket barazimeve, “të kuqtë” ngecin, pasi deri tani numërojnë shtatë të tilla, sa gjysma e edicionit të kaluar. Te kolona e humbjeve, Partizani çalon në këtë sezon, 6 humbje deri tani, një më shumë se sezoni i kaluar duke vendosur në dukje vështirësitë që ka kaluar skuadra në pjesën e parë të sezonit. Janari, merkato dhe ndryshimet në pankinë kanë dhënë frytet e para, pasi me Mehmetin, Partizani numëron 4 fitore, 2 barazime dhe 1 humbje, me 11 gola të shënuar, 5 prej të cilëve i ka realizuar Skuka dhe vetëm 3 të pësuar. Tani Partizani ka tjetër “look” me Mehmetin në pankinë, Skukën në sulm dhe me skuadrën që javë pas jave fiton stabilitetin dhe harmoninë e munguar, duke u rikthyer te shinat e duhura. Horizonti i “të kuqve” nuk është aspak premtues dhe shkalla e vështirësisë sa vjen edhe rritet, sepse pas derës janë Vllaznia, Dinamo, Kukësi dhe Tirana.
