Ish-kryeministri Sali Berisha po përgatitet për të pushtuar selinë e Partisë Demokratike dhe çuar vendin drejt trazirave. Më 20 dhjetor të këtij muaji, ish-kryeministri Berisha zhvilloi një protestë kundër qeverisë “Rama 3” dhe vizitës në Tiranë të kryeministrit serb, Aleksandër Vuçiç. Ky tubim nisi para godinës së demokratëve dhe në finale u përqendruar përpara selisë së Kryeministrisë, ndërsa ish-kryeministri Berisha e kishte paralajmëruar se do të ishte madhështor. Por ky parashikim nuk rezultoi i saktë, pasi thirrjes së Berishës për protestë iu bashkuan pak qytetarë. Për rrjedhojë plani i Berishës për t’i treguar “muskujt” kryeministrit Edi Rama, kryedemokratit Lulzim Basha dhe ndërkombëtarëve, u hodh në “erë”. Vetë Berisha dhe mbështetësit e tij e justifikuan dështimin e këtij manifestimi, me arsyetimin se koha në dispozicion nga thirrja deri tek mbajtja e protestës ishte vetëm 48 orë, që sipas tyre, nuk ishte në favor të qytetarëve.
Berisha mobilizon mbështetësit për të pushtuar PD-në
Por duket se Sali Berisha nuk dorëzohet, sepse ai ka thirrur një tjetër protestë kombëtare, të cilën kërkon ta përdorë si provë force kundër kundërshtarëve të tij, e veçanërisht kreut të PD dhe pse jo për të treguar se ai ka mbështetje masive. 5 Janari 2022 është afati i fundit që Komisioni i Rithemelimit të Partisë Demokratike i ka lënë Lulzim Bashës që të largohet nga zyra pas referendumit për shkarkimin e tij. Në të kundërt siç kanë pohuar Berisha dhe ithtarët e tij, Basha do të dalë nga zyra nga presioni i demokratëve. Këtë të premte Berisha paralajmëroi se më 8 janar, që i bie 3 ditë pasi të skadojë ultimatumi ndaj Bashës, qytetarët shqiptarë janë thirrur prej tij në një protestë kombëtare. Ndërkohë gazeta ka mësuar detaje nga organizmi, teksa mësohet se ish-lideri demokrat ka mobilizuar mbështetësit që punojnë fort, që të kenë sa më shumë njerëz në tubimin e thirrur prej tij. Mësohet se në të gjithë vendin besnikët e Berishës kanë nisur takimet, duke lobuar dhe bindur demokratët që t’i bashkohen protestë së 8 janarit. Tubimi është thirrur kundër skandaleve të fundit që kanë ndodhur në vend, siç është rrjedhja e të dhënave të qytetarëve, ndërsa thuhet se do të mbahet para godinës së Policisë. Mirëpo burime të sigurta pohuan se protesta e 8 janarit pritet të mbyllet në ambientet e SHQUP-it, ku Berisha dhe mbështetësit e tij do të tentojnë të pushtojnë selinë e PD, nëse Lulzim Basha ka refuzuar ultimatumin e tyre që i jepte kohë për të reflektuar deri më 5 janar. Pra sipas të njëjtave burimeve, mësohet se në prapaskenë Berisha ka mobilizuar mbështetësit e tij që të çojnë në protestë sa më shumë qytetarë, të cilët do t’i përdorë pastaj për të marrë në kontroll selinë blu. Kjo do të thotë se qëllimi i vërtet i protestës së 8 janarit të vitit që vjen, nuk janë skandalet e qeverisë, por pushtimi i godinës së Partisë Demokratike nga një numër i madh qytetarësh, ç’ka në një farë mënyre do të “përkëdhelte” edhe sedrën e Berishës, duke iu treguar të gjithë se shikoni sa shumë mbështetje kam. Kujtojmë që këtë të premte që shkoi vetë Berisha nga emisioni “Zonë e Lirë” zbuloi se demokratët do shkojnë tek selia blu, nëse Basha nuk reflekton. “Data 8 do jetë datë protestë e fuqishme, është përcaktuar datë proteste kombëtar, 44 mijë anëtarë të PD që firmosën të bëjnë historinë do të marrin në dorëzim selinë blu. Kjo nuk ka asnjë lloj diskutimi”, deklaroi Berisha.
