Ndryshon situata në garën për Gjykatën Kushtetuese. Teksa po tentohej që Vitore Tusha të mbahej në detyrë dhe të mos lejohej plotësimi i vakancën së saj, surprizat kanë ardhur nga Apeli Administrativ. Gjykata ka pranuar padinë e Zhaklin Petos, e cila garonte për dy vende vakante në Kushtetuese, atë të Fatmir Hoxhës dhe atë të Vitore Tushës. Gjykata e Apelit Administrativ vendosi pranimin e pjesshëm të padisë së Zhaklin Petos, duke shfuqizuar vendimin e mëparshëm të KED. Me rikthimin saj në lojë ndryshon tërësisht situata. KED prej disa muajsh ka nisur plotësimin e vakancën së Fatmir Hoxhës dhe Vitore Tushës. Për emrin e parë u kualifikuan 4 kandidatë, ndërsa për vakancën e Tushës vetëm 2. Duke qenë se ligji kërkon që 3 emra të shkojnë në institucionin e emërtesës, nuk u vijua me procesin e pikëzimit dhe u informua Gjykata e Lartë për situatën dhe kjo e fundit duhej të vendoste nëse do e rihapte garën apo jo. Por tashmë Peto u rikthye në garë dhe shkon në 3 numri i emrave për vakancën e Tushës, çka hap rrugën që të vijohet me renditjen e kandidatëve. Lidhur me situatën reagoi edhe vetë KED. “Këshilli i Emërimeve në Drejtësi u vu në dijeni të vendimit të Gjykatës Administrative të Apelit në lidhje me padinë e paraqitur nga kandidatja Zhaklina Peto, kundër vendimeve për ndalim Nr.16 datë 18.11.2021 dhe Nr.17 datë 18.11.2021 të KED. Gjykata Administrative e Apelit ka vendosur prishjen e vendimeve dhe kthimin e kandidaturës në procesin e vlerësimit të kritereve ligjore. KED vlerësoi të presë vendimin e arsyetuar në lidhje me çështjen për të vijuar më pas me procedurën ligjore mbi këtë kandidate”, tha KED përmes një njoftimi për mediat.
Nis renditja e kandidatëve
Ditën e djeshme Këshilli i Emërimeve në Drejtësi ka nisur procesin e renditjes së kandidatëve për vakancën e Fatmir Hoxhës. Dje është bërë intervista me gojë dhe testimi i gjuhës së huaj për dy emrat e parë, ndërsa më pas do të vijohet me emrat e tjerë. “Sikurse ishte njoftuar KED vijoi sot me zhvillimin e intervistës, testimin e njohurive të gjuhës së huaj me kandidatët e lejuar që kandidojnë për gjyqtar të Gjykatës Kushtetuese, në vendin vakant të ish gjyqtarit Fatmir Hoxha, të rishpalluar nga Gjykata e Lartë në datë 03.06.2021. Në intervistë u morën kandidatët Albert Demirneli dhe Alket Jaupaj, ndërsa për kandidatët e tjerë do të zhvillohet e njëjta procedurë, në mbledhjen e radhës e cila do të njoftohet nga KED”, thuhet në njoftimin e KED.
Procesi i përzgjedhjes
Sipas ligjit, Këshilli i Emërimeve në Drejtësi, pas vlerësimit të kushteve dhe kritereve të emërimit, brenda 10 ditëve rendit kandidatët dhe i paraqet Kryetarit të Gjykatës së Lartë raportin e miratuar me shumicën e të gjithë anëtarëve, bashkë me listën dhe dokumentacionin shoqërues, për çdo kandidat. Raporti i arsyetuar, pasi miratohet me shumicën e votave të të gjithë anëtarëve të Këshillit të Emërimeve në Drejtësi, publikohet. Më pas, Kryetari i Gjykatës së Lartë thërret mbledhjen e Posaçme të gjyqtarëve të Gjykatës së Lartë. Mbledhja është e vlefshme nëse marrin pjesë jo më pak se një e dyta e të gjithë gjyqtarëve të Gjykatës së Lartë. Nëse nuk arrihet shumica e nevojshme, kandidati i renditur i pari nga Këshilli i Emërimeve në Drejtësi konsiderohet i zgjedhur.
