Edicioni i 19 i “Tirana International Film Festival” hapet me filmin “Zgjoi” nga Blerta Basholli, fitues i tre çmimeve kryesore në “Sundance Film Festival 2021”, festivalin më të rëndësishëm në SHBA. Hapja e festivalit bëhet më 24 shtator në kinema Millenium. Festivali do të zhvillojë këtë vit edicionin e 19 nga data 24 deri më 30 shtator, me drejtor Agon Domin. Në TIFF do të shfaqen 112 filma në kompeticion në të gjitha kategoritë dhe zhanret kinematografike dhe do të jenë 110 filma jashtë kompeticionit me programet speciale. Ky edicion shënoi një numër rekord aplikimesh prej 2950 filmash nga 118 vende të botës edhe për faktin se TIFF është Oscar qualifying dhe është një mundësi e madhe për ta të nominohen për “Academy Awards”. Nga 40 vende të Europës janë 1706 filma, nga 11 vende të Amerikës së Veriut 558 filma, nga 8 vende të Amerikës së Jugut 66 filma, nga 38 vende të Azisë 530 filma, nga 17 vende të Afrikës 34 filma dhe nga 4 vende të Australisë dhe Oqeanisë 56 filma. Në materialin rreth festivalit bëhet me dije se nga 2950 filma 705 janë studentë dhe 930 debutantë. “2950 filmat janë realizuar nga femra 1191 filma dhe 1704 nga meshkuj”, thuhet në material. Ky edicion do të hapet me premierën kombëtare të filmit Hive (Zgjoi) nga Blerta Basholli në orën 19:00 në kinema, dhe do të mbyllet po me një premierë kombëtare, është filmi “Looking for Venera” nga Norika Sefa, fitues i disa çmimeve në festivale të huaja.
Katër juri ndërkombëtare
TIFF këtë vit do të ketë 4 juri ndërkombëtare, që do të vendosin për çmimet me prezencën e personaliteteve fitues të shumë çmimeve ndërkombëtare, si: Mohamed Siam (Francë) dhe Basil Khalil (Palestinë), producente dhe regjisore, si dhe të dy anëtarëve të “Academy of Motion Picture Arts and Sciences” SHBA, të cilët kanë të drejtën të vendosin për çmimet Oscar, Bogdan Muresanu (Rumani), fitues “European Film Award 2020”. Do të jenë gjithashtu në juri Giovanni Robbiano (Itali), Sandra Kawar (Jordani), Simeon Ventsislavov (Bullgari), Alessandra Pastore (Itali), Nazl? Eda Noyan (Turqi), Maria Di Razza (Itali), Predrag Bambic (Serbi), Ismet Sijarina (Kosovë), Jean Paul Pauëels (Belgjikë), Barbara Gasser (Austri), Jen Alvares (USA), Sehad Cekic (Mal i Zi), Ben Apolloni (Maqedonia e Veriut), dhe Erenik Beqiri, Blerina Hankollari, Anila Varfi nga Shqipëria. Gjatë ditëve të festivalit do të vijnë gjithashtu në Tiranë për të prezantuar filmat e tyre afro 30-40 regjisorë dhe producentë, që kanë konfirmuar deri tani ardhjen në festival. “FOCUS 2021” do të jetë një program special në bashkëpunim me “Danish Film Institute” me filma, debate dhe tryeza të rrumbullakta i quajtur “UN/DOGMATIC – Kinemaja Daneze” me 5 filma nga regjisorët më të famshëm e të vlerësuar sot në botë si Lars Von Trier dhe Thomas Vinterberg, ndërsa programi “Panorama” ka disa seksione me filmat. Duke pasur parasysh rregullat e pandemisë ky do të jete një edicion me shfaqje të kufizuara në kinema si dhe online për ndjekësit e shumtë në Shqipëri dhe në botë.