Sekretari i Përgjithshëm i Partisë Demokratike, Gazment Bardhi dje konfirmoi se disa prej figurave në PD përfshirë dhe atë vetë kanë pasur një takim me ambasadoren e SHBA, Yuri Kim sa i përket çështjes së Berishës. Bardhi tha se disa deputetë të Grupit Parlamentar të PD-së kanë pasur kontakte nga ambasada e SHBA. Sekretari u shpreh se çështja e Berishës është diskutuar prej kohësh dhe sipas tij nëse Basha nuk do të merrte vendimin për përjashtim, interesat e partisë do të cenoheshin. “Disa deputetë të Grupit Parlamentar të PD-së kanë pasur në dijeninë time kontakt nga ambasada e SHBA-ve. Një proces informimi mbi çështjen. Janë informuar një pjesë e konsiderueshme e deputetëve të PD. Edhe unë kam pasur takim. Kam qenë më i informuar për shkak të pjesëmarrjes në disa takime ku kanë qenë prezentë edhe zyrtarë të tjerë të SHBA-së. Është diskutuar prej kohësh. Berisha ishte prej dy muajsh në kontakt me Bashën dhe ndërkombëtarët, nuk u mor papritur. Nëse Basha nuk do merrte këtë vendim, interesat e PD do ishin cenuar në mënyrë të parikuperueshme”, tha Bardhi. Lidhur me vendimin e përjashtimit të Berishës, Bardhi tha se ka lënduar çdo anëtar, por primar për të gjithë është interesi i PD. Sipas tij, vendimmarrja e Bashës ishte e vetmja zgjidhje për situatën e krijuar. “Dua të shpreh qëndrimin tim mbi këtë vendim. Çdo anëtar i PD është lënduar nga lëndimi. Lëndimi nisi kur SHBA shpalli “non grata” Sali Berishën, që është pjesa më e lavdishme e PD. Kjo vendimmarrje apo ky vendim, sigurisht që lëndon. Secili prej nesh, duke nisur tek Basha deri tek anëtari i thjeshtë duhet të kenë primar interesin e PD. Kam bindjen e thellë se kjo ishte e vetmja rrugë për zgjidhjen e kësaj çështje. Kishte edhe rrugë të tjera, por vendimmarrja e Bashës, ishte e vetmja zgjidhje për situatën e krijuar, situatë në të cilën nuk do të donim të ishim”, u shpreh ai.
