Është regjistruar një përplasje këtë mbrëmje mes operatorëve të bizneseve në Lungomare të Vlorës dhe Policisë. Në fotot e siguruara nga gazetari Enrik Mehmeti, shihet se si një grua, shoqërohet forcërisht nga uniformat blu.
E gjitha nisi nga protesta e ndërmarrë nga operatorët turistikë përgjatë zonës së Lungomares në Vlorë. Këta të fundit, pas orës 22:00, që përkon dhe me orarin për ndalimin e muzikës, vendosën në sfond, kolonën zanore të Himnit Kombëtar.
Operatorët në këtë pjesë të qytetit, ditët e fundit kanë paralajmëruar protesta, pasi janë kundër orarit aktual të lejimit të muzikës. Ata kërkojnë zgjatje të saj, pasi sipas tyre, kjo masë ka ndikuar negativisht në mbarëvajtjen e biznesit, në këtë periudhë të vitit, ku dhe qyteti frekuentohet nga qindra turistë vendas e të huaj.
