Kategoria Superiore luajti dy prej 5 ndeshjeve të saj të javës së 24-t, ku ra në sy disfata e rëndë e Vllaznisë në fushën e saj ndaj Bylisit, një disfatë që regjistron një rënie të pashpjegueshme të skuadrës shkodrane dhe natyrisht kërcënimin serioz të saj të bjerë në renditje aq sa ,mund ta humbasë kreun duke nisur nga dita e sotme. Një humbje që dhemb, ndërkohë që në 5 takimet e fundit në Superiore, shkodranët nuk kanë fituar asnjë ndeshje dhe kanë marrë gjithsej vetëm 2 pikë, statistika që tregojnë se Vllaznia është “jashtë objektivave”.
Ndeshja/ Të fortin në Shkodër e bën Bylisi
Vllaznia e Thomas Bërdariç ka harruar si fitohet. Bylis bëri surprizën e madhe në javën e 24-t të Kategorisë Superiore duke mposhtur 2-1 me përmbysje shkodranët brenda në “Loro Boriçi” në një ndeshje që u dominua për pjesën më të madhe të kohës nga Vllaznia dhe që krijoi përshtypjen se kuqeblutë do riktheheshin te fitorja, por në fund festa ishte e gjitha për ballshiotët që morën tre pikë me shumë peshë thelluan krizën e Vllaznisë që e çoi në 5 numrin e ndeshjeve pa fitore. Sfida e “Loro Boriçit” nisi me Vllazninë më kërkuese. Në minutën e 6-të këmbëngulja e togolezit Elom për pak sa nuk u shpërblye, por anësori afrikan nuk goditi portën dhe në fund gaboi në pasimin për Dilaver. Në minutën e 10-të erdhi edhe kundërpërgjigja e Bylis, por Zogovic tregohet më i shpejtë dhe i paraprin Ndrecës që po dilte i vetëm përballë portierit të Vllaznisë. Në të 14-ën Vllaznia u shpërblye. Kuqeblutë kaluan në avantazh, një krosim i Ardit Krujës nga e djathta gjeti të lirë në qendër të zonës Haris Dilaver i cili devijoi topin me gju duke mposhtur Pano Qirkon për golin e tij të 7-të në këtë sezon. 6 minuta më pas Vllaznia ishte shumë pranë golit të dytë, por Elom nuk kishte saktësinë e duhur në finalizim me goditjen e që shkoi për fare pak lart kuadratit. Në të 35-ën u regjistrua një tjetër mundësi e shkëlqyer për Vllazninë. Pas disa veprimeve të bukura teknike, Demir Imeri nxori në një pozicion të mirë goditës Elom, por tentativa e togolezit ishte tërësisht e gabuar dhe shkoi lart portës. Në minutën e 40-të kombinime të bukura mes Dilaver dhe Imerit por goditja e këtij të fundit ishte e lehtë dhe u dërgua në këndore nga Qirko.
Diferenca mes pjesëve
Me avantazhin minimal të shkodranëve u mbyll pjesa e parë ndërkohë që edhe në fillimin e fraksionit të dytë rastet më të mira për gol i kishte skuadra e Bërdariç. Në të 51-ën provoi Dilaver por reagoi mirë Pano Qirko, ndërkohë që në vazhdimin e aksionit Kruja nuk gjeti portën. Në të 58-ën tjetër mundësi e mirë për Vllazninë, por Dilaver goditi vetëm rrjetën e jashtme pas asistit të Imerit. Bylis pavarësisht se shikonte shpesh nga porta e Vllaznisë i mungonte pasimi i fundit për të rrezikuar portën e Zogoviç. Në të 69-ën ishin sërish shkodranët të rrezikshëm, por goditja me kokë e Adilit u devijua në këndore nga Pano Qirko. Por atëherë kur askush se priste Bylis me shumë fat ndëshkoi Vllazninë pas një kundërsulmi të shpejtë në minutën e 76-të me të sapofuturin në lojë sulmuesin Renato Spahiu, që u gjend në vendin dhe në kohën e duhur për të mposhtur Zogoviç pas një topi të larguar jo mirë nga portieri i kuqebluve. Në minutën e 83-të iu afrua përmbysjes së madhe, por goditja e Antoni nuk gjeti portën.
Përmbysja e madhe e Bylisit
Në fakt, shansin e artë për të dalë me tre pikë nga ky duel Bylis e kishte 1 minutë para fundit të kohës së rregullt, teksa pas një kundërsulmi të shpejtë, me ballshiotët që ishin 3 kundër 2, Antoni nuk finalizoi siç duhet duke goditur mbi traversë. Atë që se bëri në të 89-ën, Antoni e bëri realitet në minutën e 94-t duke kthyer në gol një 11-metërsh për t’i dhënë një fitore të madhe me përmbysje Bylisit. Në minutën e 92-të pas një tjetër kundërsulmi të shpejtë të mallakastriotëve, gjyqtari Beqiri akordoi penallti për një faull të Gurishtës ndaj Haris Harbës, me Antoni që nuk gaboi duke i dhënë fitoren e dytë në transfertë Bylisit në këtë sezon dhe 3 pikë jetike në garën për mbijetesë.
