Ish-kryeministri Sali Berisha rrëfeu mbrëmjen e djeshme se kryedemokratin Lulzim Basha e ka njohur në vitin 1991, kur ai shoqëronte një mjek të njohur, edhe pse në atë kohë ishte vetëm një gjimnazist.
I pyetur se përse vendosi që ta bënte pjesë të Partisë Demokratike, ish-kryeministri tha se nuk ka qenë ai që e ka zgjedhur Bashën, por ka shkuar ai vetë, bashkë me Sokol Olldashin.
Pjesë nga biseda:
Sali Berisha: Lulzim Bashën e kam njohur në vitin 90-91, shoqëronte një mjek që punon për të drejtat e njeriut në Kosovë ai mjeku. Atëherë Lulzimi ishte gjimnazist. Shkoi për studime në Holandë dhe i njihja. Njihja të shoqen, Aurelën që punonte me një think tank të Instituti Demokratik Amerikan. Kisha një njohje, kontakte jo të afërta, por kisha një njohje.
Blendi Fevziu: A e përzgjodhët ju Lulzim Bashën në krye të Partisë Demokratike?
Sali Berisha: Absolutisht jo!
Blendi Fevziu: Nuk ndërhytë fare në proces?
Sali Berisha: Jo. Erdhi dhe më tha. Pas tij erdhi i ndjeri Sokol Olldashi.
Blendi Fevziu: Nga nënkryetarët tuaj?
Sali Berisha: Asnjëri. Vetëm këta të dy erdhën dhe që të dy u mbështetën. Unë mendova që udhëheqja tjetër e partisë të mos lobonte as për njërin as për tjetrin. Këtë u kujdesa unë që partia të ishte indiferente. Për të mos krijuar çarje.
