Premier League ka ndryshuar totalisht klasifikimin pas rezultateve të fundit. Leicester City rikthehet pas 4 vitesh në krye të klasifikimit pas fitores minimale ndaj Wolverhampton.
Në fakt ‘Dhelprat’ përfituan nga barazimi 1-1 mes Liverpool dhe Manchester City teksa Totenham ka marrë vendin e dytë pas fitores 0-1 ndaj WBA. Tashmë vendin e tretë e mban Liverpool, kurse në vendin e katërt është përsëri një skuadër surprizë Southampton që deri dje kishte kryesimin.
Në vendin e pestë është Chelsea që e ka rimarrë veten me rezultatet pozitive në muajin tetor, kurse në vendin e gjashtë është Aston Villa që ka shokuar Arsenalin me rezultatin 0-3 në ‘Emirates’. Manchester City dhe Arsenal ndajnë vendin e 10-të dhe 11-të kurse Manchester United në vendin e 14-të.
Duket se Premier League është kthyer në një ‘Formula 1’ pasi 8 javë pas startit diferenca mes vendit të parë dhe të gjashtë është vetëm 3 pikë kurse mes vendit të parë dhe të 15-të është vetëm 8 pikë.