Britma gëzimi vijnë ende nga ekipet e shpëtimit në Izmir të Turqisë, ku fatkeqësisht numri i viktimave ka shkuar në 100. Pas 91 orësh kërkime është nxjerrë e gjallë nga rrënojat 4-vjeçarja Ayla Gezgin, në kompleksin e pallateve Riza Bey.
Nusret Aksoy nga ekipi që shpëtoi fëmijën thotë se: Ishte një lavastovilje që kishte formuar një si trekëndësh. Pashë lavastoviljen dhe ajo ishte në mes. Reagoi duke më ngritur dorën. Dëgjova britmën e saj të parë. Më pas u thashë kolegëve që më ngriti dorën dhe më përshëndeti”.
Fëmija shpëtoi për mrekulli dhe u dërgua me ambulancë në spital, operacion që u shoqërua me duartrokitje.
Ndërkaq është konfirmuar se edhe nëna e Ayla është nën rrënoja.
