Policia ka dhënë detaje lidhur me ngjarjen në Kamëz mëngjesin e sotëm.
Bëhet e ditur se është vënë në pranga një 16-vjeçar pasi ka plagosur me thikë në kurriz dhe shpatull një 19-vjeçar. Ky i fundit ka pësuar dëmtime të rënda trupore dhe ndodhet në spitalin e Traumës, por jashtë rrezikut për jetën. Gjithçka nisi nga një sherr banal mes të rinjve.
Ndërkohë hetimet kanë nisur për plagosje të lehtë me dashje dhe për E.R., 34 vjeçc, shok i 19-vjeçarit pasi ka goditur me mjete të forta në trup të miturin.
NJOFTIMI I PLOTE
Goditi me thikë një 19-vjeçar, pas një konflikti për motive të dobëta, arrestohet në flagrancë 16-vjeçari.
Procedohet penalisht edhe një 34-vjeçar i përfshirë në konflikt.
Shërbimet e Policisë Kamzë arrestuan në flagrancë për veprën penale “Vrasja me dashje” e mbetur në tentativë”, shtetasin e mitur me iniciale Sh. D., 16 vjeç, banues në Laknas, sepse në trotuarin e rrugës “Bulevardi Blu”, Kamzë, pas një konflikti për motive të dobëta me shtetasin E. D., 19 vjeç, banues në Kamzë, e ka goditur atë me thikë disa herë në kurriz dhe në krah, duke i shkaktuar dëmtime të rënda trupore.
Gjithashtu u procedua penalisht për veprën penale “Plagosja e lehtë me dashje”, shtetasi E. R., 34 vjeç, banues në Kamzë (shoku i E. D.), sepse ka goditur me mjete të forta në trup shtetasin Sh. D.
Aktualisht shtetasi E. D. ndodhet në Spitalin e Traumës, jashtë rrezikut për jetën.
