Ka përfunduar seanca e gjatë e mbajtur në Komisionin e Pavarur të Kualifikimit për gjyqtaren Fatmira Hajdari.
Në dalje, pas mbarimit të seancës gjatë drekës, gjyqtarja është parë të largohet e vetme, ndërsa në duar mbante një dosje.
Hajdari është përlotur sot para trupës së KPK, teksa jepte shpjegimet për pasurinë e saj.
Ajo ka sqaruar pasurinë e saj, duke thënë se jeton ende në vilën që ka blerë bashkëshorti i saj i ndjerë, Azem Hajdari, në vitet 90. Gjyqtarja është shprehur se ka bërë gjithmonë deklarime të sakta të pasurisë, po sipas saj, banka në atë kohë shkruante në dokumente fakte të paqena.
“Rrjedha ime familjare ne Tiranë ka nisur në vitet 1990. Na keni kthyer 30 vjet pas. Bashkëshorti im ka qenë deputet në vitet 90. Pas ardhjes në Tiranë kemi marrë një shtëpi tek ish-vilat gjermane. Në 1993 kam punuar në Ministrinë e Drejtësisë. Unë jetoj në të njëjtën vilë që ka blerë bashkëshorti im. Kam qene korrekte në deklarimet e mia. Të gjitha blerjet janë bërë para se të bëhesha subjekt për të deklaruar. Unë shkova te apartamenti i kunatit, pasi në atë kohë isha e kërcënuar për shkak të situatës”, tha ajo ndër të tjera.
