Moisi Habilaj, arrestimi i të cilit solli një zhurmë të madhe politike në vendin tonë dhe hapi një proces gjyqësor ndaj ish-ministrit të Brendshëm, Saimir Tahiri, është liruar nga burgu. Gjykata e Apelit të Katanias ka caktuar ndaj Habilajt masën e sigurisë “Arrest shtëpie”, deri në dhënien e dënimit të formës së prerë ndaj tij. Vendimi për lirimin e Moisi Habilajt u dha mesditën e së mërkurës nga Gjykata e Apelit të Katanias. Rreth një vit më parë më konkretisht në 19 qershor të vitit të kaluar Moisi Habilaj u dënua nga Gjykata e Shkallës së Parë të Katanias me 15 vite burg, vendim i cili u apelua nga mbrojtja. Seanca e parë në shkallën e dytë ndaj Moisi Habiljajt dhe grupit të tij u zhvillua më 15 maj, gjatë kësaj seance mbrojtja kërkoi ndryshimin e masës së sigurisë ndaj klientit të tyre, kërkesë e cila u pranua nga gjykata. Në vendimin e saj për lirimin e Habiljat, gjykata ka argumentuar se i pandehuri nuk ka rrezik për t’u larguar nga Italia apo të ndikojë në prishjen e provave. Gjithashtu në vendimin e saj Gjykata e Apelit të Katanias thotë se i pandehuri Habilaj do të jetojë në banesën e një kushëriri të tij i papërfshirë në vepra penale, në komunën San Michele di Ganzaria në provincën e Catanias. Sipas prokurorisë italiane Moisi Habilaj së bashku me vëllanë e tij Florjan Habilaj, i shpallur në kërkim nga drejtësia italiane, konsiderohen krerët e një grupi kriminal të strukturuar italo-shqiptar që ka trafikuar armë e drogë nga Shqipëria në Itali me vlerë mbi 20 milionë euro me mbështetjen e segmenteve të caktuara të Policisë së Shtetit. Gjykata e Katanias një vit më parë dënoi me 55 vite burg 6 anëtarët e grupit “Habilaj”. Për Naser Seitin gjykata vendosi dënimin e tij me 7 vite e 4 muaj; Antonio Riela u dënua me 14 vite burg, Meridian Sulaj 8 vite e 4 muaj burg, Angelo Busaca 7 vite e 4 muaj burg, Giuseppe Greco 2 vjet e 4 muaj burg. Ndërsa u liruan nga akuzat katër shtetasit italianë, Antonio Grieco, Carmelo Bertolini, William Patane e Massimiliano Bruno. Arrestimi i Habilajt në vendin fqinj, hapi dhe një proces gjyqësor ndaj ish-ministrit të Brendshëm, Saimir Tahiri. Në atë kohë Prokuroria për Krime të Rënda akuzoi ish-ministrin se ka bashkëpunuar për trafikun e drogës. Në tetor të vitit të kaluar Gjykata e Krimeve të Rënda i rrëzoi akuzat e prokurorisë dhe dënoi Tahirin me 3 vite shërbim prove për shpërdorim detyre. Në vendimin e arsyetuar të gjykatës, në analizë të të gjitha provave të paraqitura nga prokuroria, nuk rezulton asnjë fakt që ta përfshijë ish-ministrin në trafikun e drogës dhe bashkëpunimin me grupin kriminal të Habilajve. Si gjykata ashtu edhe prokuroria apeluan vendimin dhe tashmë çështja po gjykohet nga Gjykata e Posaçme e Apelit.
Hetimet
Për median italiane, duke iu referuar të dhënave nga Prokuroria e Katanias, grupi i shkatërruar gëzonte në Shqipëri një mbështetje nga një pjesë e policisë. Sipas “Meridionews”, droga trafikohej nëpërmjet detit në Itali dhe më pas, aty i shpërndahej klaneve mafioze. Sipas prokurorisë italiane, Moisi Habilaj së bashku me vëllanë e tij Florjan Habilaj, i shpallur në kërkim nga drejtësia italiane, konsiderohen krerët e një grupi kriminal të strukturuar italo-shqiptar që ka trafikuar armë e drogë nga Shqipëria në Itali me vlerë mbi 20 milionë euro me mbështetjen e segmenteve të caktuara të Policisë së Shtetit. Grupi kryente trafikun e drogës kryesisht nga deti me anë të peshkarexhave. Kur mbërrinte në Itali droga i shitej disa klaneve mafioze në provincat e Katanias, Sirakuzës dhe Raguzës. Sipas hetimeve të autoriteteve italiane, banda e Habilajve, kishte mbrojtje në Shqipëri nga drejtues të policisë dhe trafikun e kryente nëpërmjet rrugëve detare. “Organizata, e cila në Shqipëri gëzonte mbrojtje nga disa eksponentë të policisë, të cilët ishin të implikuar, kryente trafikun kryesisht nga deti, falë mbështetjes së disa anijeve të peshkimit. Në momentin që droga arrinte në Itali, ajo kalonte në nivelin e dytë. Disa persona të tjerë e blinin atë, dhe më pas, e rishisnin te pasuese të klaneve të mafies, kryesisht të provincave të Katanias, Sirakuzës dhe Raguzës”, thuhet në dosjen e prokurorisë italiane.