Gjykata e Lartë ka aktualisht mbi 35,000 dosje të prapambetura dhe për të zgjidhur këtë problem, USAID dhe Këshilli i Lartë Gjyqësor Shqiptar nënshkruan sot një memorandum mirëkuptimi për të ofruar ndihmën teknike të nevojshme.
Pas kësaj ka reaguar edhe ambasadorja e SHBA, Yuri Kim me anë të një postimi në Twitter.
“Drejtësia e vonuar është drejtësi e mohuar. SHBA mbështet fuqimisht planet e Gjykatës së Lartë shqiptare për të zvogëluar çështjet e prapambetura sa më shpejt të jetë e mundur.”-shkruan ajo.
Sipas kësaj marrëveshjeje, një ekip i veçantë avokatësh të zotë shqiptarë do të punësohen për të ndihmuar gjykatën që të veprojë me më shumë efikasitet dhe të mundësojë që gjykatësit të marrin vendime më shpejt.
