Drejtori i Instituti gjerman për Shëndet Publik, pretendon se përqindja e të infektuarve me koronavirus në këtë shtet ka filluar të tregojë rënie, duke theksuar se suksesi i masave të reja në këtë vend kanë dhënë rezultate.
“Kemi vërejtur se kemi rënie të personave të prekur me koronavirus”, ka deklaruar Lotar Viler, shef i Institutit Robert Koh.
“Por këtë trend mund ta konfirmoj përfundimisht në fund të kësaj jave”, ka shtuar ai.
Gjermania ka qenë ndër vendet e para evropiane që ka vënë një sërë ndalesash për të reaguar ndaj gjendjes së jashtëzakonshme, duke mbyllur shkollat dhe reduktuar dukshëm numrin e personave të grumbulluar në një vend.
Aktualisht në Gjermani janë infektuar me koronavirus 25.787 persona, derisa 106 tjerë kanë humbur jetën.
Ndërsa vetëm 266 persona janë shëruar nga COVID-19. Ndërkohë, kancelarja gjermane Angela Merkel është karantinuar pas kontaktit që kishte pasur me mjekun që vuante nga koronavirusi.
