Qeveria ka ndryshuar sërish Aktin Normativ të masave ndëshkimore sa i takon situatës së jashtëzakonshme për shkak të koronavirusit. Gazeta “SOT” ka siguruar një tjetër ndryshim, që ka të bëjë me kompetencat e bashkive në menaxhimin e situatës. “Pas nenit 5, të aktit normativ nr.3, datë 15.3.2020, të Këshillit të Ministrave, të ndryshuar, shtohet neni 5/1, me këtë përmbajtje: Njësitë e vetëqeverisjes vendore, në kuadër të marrjes së masave gjatë kohëzgjatjes së periudhës së infeksionit të shkaktuar nga COVID-19, me pëlqimin e operatorëve ekonomikë, mund të bëjnë amendime të kontratave që kanë me operatorët e pastrimit dhe operatorët e transportit publik për ofrimin e këtyre shërbimeve, sipas nevojave të diktuara nga situata emergjente. Kontrata hyn në fuqi pas miratimit nga këshilli bashkiak përkatës. Kontrata nënshkruhet nga titullari i autoritetit kontraktor. Shpenzimet do të përballohen nga buxheti i njësive të vetëqeverisjes vendore”, thuhet në aktin normativ. Tashmë bashkitë kanë të drejtë që të marrin në dorë situatën sa i takon transporti urban dhe pastrimit.
