Ministria e Shëndetësisë dhe Mbrojtjes Sociale informon se mëngjesin e sotëm ka përfunduar testimi i tre rasteve të reja të dyshuara në laboratorin e virologjisë në Institutin e Shëndetit Publik.
Rastet ishin me histori udhëtimi me vendet e prekura nga koronavirusi COVID-19 dhe kanë rezultuar negative.
Kreu i Urgjencës Kombëtare tregon se 421 persona janë skeduar si të dyshuar me Covid-19. Ata po mbahen nën monitorim nga Urgjenca dhe për çdo shenjë të mundshme do të veprohet sipas protokolleve të hartuara.
“Në rastet kur shkojnë në banesë dhe mund t’ju shfaqen simptomat brenda 14 ditëve, bëhet e njëjta skedë këtu tek ne, vendi nga ka ardhur, sa ka qëndruar”, shpjegon Brataj. “Nëse do të vazhdojë mbi 48 orë, me temperaturë, me kollë, do të shkojë ekipi ta çojë në qendrat e infektivit”.
Sipas autoriteteve shëndetësore, ende nuk është konfirmuar rasti i parë me koronavirus në Shqipëri. 26 testime që janë kryer te personat e dyshuar kanë rezultuar të paprekur.