Kontrolli i Lartë i Shtetit ka zbardhur tjetër skandal me kompanitë celulare. Edhe pse u bllokua vendimi i tyre për të rritur çmimet e paketave, nga Autoriteti i Konkurrencës, çmimet e paketave telefonike në Shqipëri vijojnë të jenë ndër më të lartat. Sipas auditimit të bërë nga Kontrolli i Lartë i Shtetit, vendi ynë renditet i 9 mes 37 vendeve për tarifat më të larta. KLSH nënvizon problematikat që shfaqen në këtë treg dhe vë përpara përgjegjësisë në këtë rast Autoritetin e Komunikimeve Elektronike dhe Postare. KLSH shprehet se tarifat mesatare në vendet e BE dhe BEREC variojnë nga 0,77 cent/min, që është mesatarja e thjeshtë aritmetike në 28 vendet anëtare të BE, deri në 0,88 eurocent/min që është mesatarja e thjeshtë aritmetike e 37 vendeve të BEREC. “Tarifa e terminimit në Shqipëri është 0,98 eurocent/min, më e lartë se mesatarja e thjeshtë në vendet e BE dhe se tre mesataret e tjera të përllogaritura nga BEREC. Shqipëria është vendi i 9-të me tarifat më të larta nga 37 vendet e BEREC”, vlerëson KLSH.
Konstatimet
Nga auditimi, Kontrolli i Lartë i Shtetit ka nxjerrë një sërë konstatimesh. Raporti i KLSH vlerëson se tregu shqiptar telefonik është një oligopol. “Tregu i telefonisë celulare ka përqendrim të lartë, duke reflektuar një strukture oligopoli dhe kjo për shkak të rritjes gjithnjë e më shumë në treg të sipërmarrësit me pjesën më të madhe të tregut”, thekson KLSH në raport. Sakaq KLSH kujton kompaninë “Plus” e cila tani më ka dalë nga tregu. KLSH thekson se problemi tjetër që është konstatuar është edhe konkurueshmëria. “Përveç tarifave në dukje të larta, një problematikë tjetër është edhe niveli i ulët i konkurrueshmërisë së tregut të telefonisë celulare. Dalja nga tregu e operatorit Plus Communication e ka ndryshuar strukturën e tregut nga 4 në 3 operatorë, duke vijuar trendin rritës të indeksit të përqendrimit”, thuhet në raport. Pra duket se kompanitë kanë krijuar një oligopol në këtë fushë të tregtisë duke mos lënë as kompanitë e tjera që të bëhen pjesë e tregut, në mënyrë të atillë që marrëveshjet mes tyre të jenë sa më të lehta. Pak kohë më parë Autoriteti i Konkurrencës vendosi të bllokonte rritjen e tarifave dhe theksoi se të treja kompanitë kanë bërë marrëveshje me njëra tjetrën pasi rritja e çmimit ishte e njëjtë për të treja, me 200 lekë. Përqendrimi i lartë duket se ka ndikuar negativisht tek konkurrenca në treg duke bërë që të ketë mungesë efektive të saj. Sa i takon kësaj situate, Kontrolli i Lartë i Shtetit ka nënvizuar se Autoriteti i Komunikimeve Elektronike dhe Postare për periudhën nën auditim 2017-2018, nuk ka përmbushur me efektivitet mbikëqyrjen e tregut të telefonisë celulare kah ruajtjes së konkurrencës së lirë dhe të ndershme në tregun e telefonisë celulare.
Teknologjia 5G
Raporti i KLSH është ndalur edhe tek teknologjia e shumëpërfolur e rrjetit 5G. Raporti vlerëson se AKEP dhe Qeveria në tërësi nuk kanë kryer një analizë paraprake lidhur me pasojat dhe efektet që do të sjellë implementimi i teknologjisë 5G në vendin tonë. “Përfitimet ekonomiko-sociale duhet të ecin krah për krah me ato të Sigurisë Kombëtare. Implementimi i teknologjisë së gjeneratës së 5-të (5G) në Shqipëri mbart me vete një risk të lartë të thyerjes së sigurisë së informacionit dhe kërkon domosdoshmërisht të kryhet duke u bazuar në një plan-veprimi kombëtar, të detajuar qartë dhe gjithëpërfshirës, me qëllim mbrojtjen e padiskutueshme nga aksesi i paautorizuar, tjetërsimi, keqpërdorimi apo mos-disponueshmëria, e një aseti të çmuar për konsumatorin shqiptar, siç është informacioni”, vlerëson KLSH.
