Pas 14 seancash pyetje dhe deklarime para hetuesve të BKH, të cilët veprojnë në kuadrin e SPAK, Izet Haxhia, ish-truproja kryesore e ish-Presidentit të Republikës Sali Berisha përfundoi deponimet e tij për të 27 akuzat e rënda që i bënë ish-shefit të tij dhe bashkëpunëtorëve të tjerë në kuadrin e një grupi të strukturuar kriminal. Për çdo akuzë është formësuar një dosje përkatëse. Deklarimet e Izet Haxhisë dhe provat e paraqitura prej tij tashmë i kanë kaluar SPAK, i cili ka regjistruar procedimin penal kundër Sali Berishës dhe bashkëpunëtorëve të tij në kuadrin e grupit të strukturuar kriminal.
SPAK ka marrë të gatshme prej ish-Prokurorisë së Krimeve të Rënda një numër të konsiderueshëm dosjesh penale, të cilat i ka tashmë në kompetencë sipas nenit 75/a të Kodit të Procedurës Penale. Ndërsa dosja penale me kallëzues Izet Haxhinë, kundër Sali Berishës dhe bashkëpunëtorëve të tij është një procedim penal i regjistruar pas fillimit të punës së SPAK. Tre dosjet e fundit, të “kopsitura” me një numër të konsiderueshëm provash materiale, shkresore dhe me një numër të madh dëshmitarësh janë: “Vjedhja e valutës në Bankën Kombëtare, Dega Shkodër”; “Vjedhja e Rezervave të Arit në Tunelet e Kërrabës” dhe “Vrasja e Shkëlqim Haklajt me urdhërin e drejtpërdrejtë të Sali Berishës prej bashkëpunëtorëve të tij”.
Ekspertë të BKH në formim dhe të SPAK, pasi kanë marrë të shkruar dhe në audio 140 faqet kompjuterike të deklarimeve të Izet Haxhisë për krimet e rënda të kryera nga Sali Berisha dhe bashkëpunëtorët e tij në kuadrin e grupit të strukturuar kriminal, kanë vlerësuar kujtesën brilante të Izet Haxhisë, duke theksuar se është pikërisht kjo kujtesë e cila do të “varrosë” përfundimisht Sali Berishën dhe grupin e tij të strukturuar kriminal.
Në datën 16 mars 1997, ka deklaruar Izet Haxhiaj para hetuesve të BKH, e ka thirrur Sali Berisha atë dhe A.Ç, të Njësisë Speciale të SHIK, dhe i ka urdhëruar të shkonin në Shkodër, të gjenin drejtorin e degës së bankës dhe të merrnin gjithë valutën që ishte aty. Izet Haxhiaj dhe A.Ç, pasi kanë marrë me vete edhe 16 persona të tjerë të Njësisë Speciale të SHIK, kanë hipur në 3 fouristrada dhe një furgon të blinduara, kanë udhëtuar për në Shkodër. Drejtori i Degës së Bankës Shkodër ndodhej i fshehur në Kiras. E kanë gjetur dhe i kanë komunikuar urdhërin e Berishës për të marrë valutën që ndodhej në bodrumin e bankës.
Ndërsa lekët që ndodheshin në kasaforta në katin e parë të bankës ishin vjedhur, duke i thyer këto kasaforta. Morën me vete drejtorin dhe shkuan në Degën e Bankës në Shkodër. Ai kishte me vete tre palë çelësa të ndryshëm, me anën e të cilëve i hapi dyert dhe kasafortën që ndodheshin në bodrumin e bankës dhe ku gjendej valuta. Pasi hapën kasafortën, morën në dorëzim me proçes verbal 16 milionë USD, 5 milionë Marka gjermane, 1 miliardë lireta italiane dhe një sasi më të vogël Paund anglez. Pasi i ngarkuan në fugonin e blinduar, kanë mbërritur në Tiranë rreth orës 02:00 të mëngjesit.
Urdhëri i Berishës ishte që e gjithë valuta e kësaj banke t’i dorëzohej zëvendësguvernatores së Bankës së Shqipërisë, Elisabeta Gjoni. Në orën 02:30 të mëngjesit janë takuar me Elisabeta Gjonin në shtëpinë e saj dhe i kanë dorëzuar valutën, në shifrat e lartpërmendura. Izet Haxhiaj ka deklaruar para hetuesve të SPAK se babai i Elisabeta Gjonit ishte punonjës i Sigurimit të Shtetit dhe Berisha takohej shumë shpesh me të në shtëpinë e tij. Pas pak ditësh që 16 milion USD, 5 milion marka gjermane, 1 miliardë lireta italiane dhe sasia e paundve anglez ju dorëzua Elisabeta Gjonit, doli lajmi në televizion, në radio dhe në gazeta se ishte vjedhur me thyerje prej “rebelëve” e gjithë valuta që ndodhej në Degën e Bankës në Shkodër. Në këtë kohë Elisabeta Gjoni u arratis në Amerikë. Në vitin 2005 kur Sali Berisha u zgjodh Kryeministër i Shqipërisë, Elisabeta Gjoni u emërua anëtare e Bordit të Bankës së Shqipërisë…
