Analisti Frrok Çupi parashikon arrestime të bujshme në nivele të larta me ngritjen e Strukturës së Posaçme kundër Korrupsionit dhe Krimit të Organizuar (SPAK).Çupi shkruan se SHBA dhe BE nuk u përkulën para “Kumbarës”, bosit të krimit, kryemafiozit në Shqipëri, edhe pse vendi kaloi situatën e rëndë nga tërmeti, por nxituan kundër peshkut të madh edhe në dimër.
“Sot ishte dita kur Amerika, përmes Përfaqësisë së saj në Tiranë, dha lajmin se ‘këtë javë SPAK do të funksionojë’ kundër korrupsionit ‘të nivelit të lartë’.
… Po pse përfaqësuesit e Shteteve të Bashkuara, Bashkimit Evropian dhe Britanisë së Madhe, sot pasdite u drejtuan për në zyrën e Ministrit të Brendshëm?”, ngre pyetjen Çupi.
Shkrimi i plotë:
Pse u drejtuan ambasadorët e vendeve superfuqive aleate për te Ministri i Brendshëm? Kjo është pyetja me përgjigjen që mbyllet brenda javës…
Të gjitha do të rrokullisen gjatë kësaj jave, me sa duket. Tamam si në letrat e fallit:
E para, përmbyset stina. Sipas paralajmërimit amerikan kundër ‘kumbarëve’ të krimit në Shqipëri ishte thënë se ‘do të kapen peshqit e mëdhenj’. Por peshqit natyralë kapen në stinët e tjera, jo mes akullit. Vetë ‘peshqit’, siç nuk ka ndodhur kurrë në jetë, e vonuan procesin e njeriut peshkatar. Kjo e detyroi edhe vetë superfuqinë që të shtyjë stinën e gjuetisë. Por ama tani ka ardhur ora.
U rrokullis filxhani i kafesë. Sipas ‘filxhanit’ ishte parashikuar që të niste nga zyrtarët e rangut jo më të lartë, derisa të ngjitej në majë. Ndërsa guximi për të penguar Reformën në Drejtësi, Gjykatën Kushtetuese, etj., e ka detyruar Drejtësinë e formësuar nga Amerika plus Evropa, që të nisë nga maja më e lartë. Prej kaq kohësh kanë humbur ‘sloganet tipike mafioze ‘me qetësi e dashuri!’, si dhe slogane të tjera.
Rrokulliset Realiteti drejt një filmi thuajse i vjetër. Zakonisht filmi ndjek Realitetin, por kësaj here ndodhi ndryshe: Realiteti ndodqi gjurmët e filmit. Filmi është prodhim i vitit 1972 dhe titullohet ‘The Godfather’ ( Kumbara). Tipizimi ‘Kumbara’ ka hyrë në fjalorin e gjithë botës si Kryemafiozi. Bosi i krimit, Vito Corleone, (Marlon Brandon) dhe të bijtë ( Al Pacino dhe James Caan), sjellin rrotull Mbretërinë e Nju Jorkut me mafien e Drejtësisë.
Atëherë…
Sot u përmbys edhe një kualitet tjetër i superfuqive, SHBA dhe BE. Këta nuk mund të ruanin më durimin duke e ndjekur pa nxitim krimin e kumbarëve të mafies në Shqipëri. Tërmeti i ditëve të fundit i bëri të ulnin kokën në shenjë zie dhe dhimbjeje, por jo kurrë para krimit. Ndërsa kumbarët menduan se ‘Amerika e uli kokën’ para tyre. Gjatë zhvarrimeve dhe varrimeve të viktimave, kumbarët gëluan nëpër dosje e nëpër intervista me kërcënime se do të ndalojnë edhe vetë reformën në Drejtësi. Pa reformë ‘Kumbara’ jeton njëmijë vjet ‘me qetësi e dashuri’…
Ja pra, për këtë arsye Amerika dhe Evropa e desh të ndiznin shpejtësinë dhe të nxitonin kundër ‘peshkut’ edhe në dimër.
Sot ishte dita kur Amerika, përmes Përfaqësisë së saj në Tiranë, dha lajmin se ‘këtë javë SPAK do të funksionojë’ kundër korrupsionit ‘të nivelit të lartë’.
… Po pse përfaqësuesit e Shteteve të Bashkuara, Bashkimit Evropian dhe Britanisë së Madhe, sot pasdite u drejtuan për në zyrën e Ministrit të Brendshëm?
Sepse ka ardhur ora e fundit!- kjo do të thotë. ‘Ora e fundit’ do të thotë se nuk ka më ‘ideologji’, ‘fe’, ‘besim politik’, ‘fall’, as ‘tërmet’ dhe as ‘qetësi e dashuri’… Aleatët përgatisin operacionin; por pa ‘dhimbje’. ‘Kumbarët’, si në filmin e famshëm, mund të nxirren nga selitë, pa pikën e tollovisë. Forcat e ruajtjes së Rendit dhe të stabilitetit, megjithatë do të jenë vigjilente. Nuk do të mund përsëritet as 13 shkurti, dhe as ‘lufta e dhjetë’ në 8 korrik të vitit 2019, me bomba molotov duke paralajmëruar Perëndimin që të ‘hapë krahun’ se ‘këtu sundojmë ne’.
Ky është kuptimi i vizitës së përfaqësive të superfuqive në zyrat e Forcave të Ruajtjes së Qetësisë. Perdja e teatrit me slogane të ‘bosit Corleone’ bie këtu; ose nis të bjerë këtu.
Kështu u rrokullis kjo ditë e 12 dhjetorit. Amerika ka thënë se ‘këtë javë’…
